რუსეთში არაერთმა დეპუტატმა, ჟურნალისტმა და შოუბიზნესის წარმომადგენელმა უკრაინაში სამხედრო აგრესია დაგმო. საჯარო განცხადებებს რუსული მედიები ავრცელებენ.

კომერსანტის, დოჟდის, ნოვაია გაზეტას, RBC-ს, ეხო მოსკვის, The Bell-ის, RTVI-ის, Snoba-ს, 7x7-ის, Izvestia-ს, Mediazona-ს და სხვა მედიასაშუალებების ჟურნალისტებმა საჯაროდ განაცხადეს, რომ ომს გამართლება არ აქვს.

ჩვენ, რუსული მედიის კორესპონდენტები და ექსპერტები, რომლებიც წერენ რუსეთის საგარეო პოლიტიკაზე, ვგმობთ რუსეთის ფედერაციის მიერ უკრაინაში დაწყებულ სამხედრო ოპერაციას. ომი არასოდეს ყოფილა და არც იქნება კონფლიქტების მოგვარების მეთოდი და ამას არანაირი გამართლება არ აქვს

ამ განცხადებას ხელს 100 ჟურნალისტი აწერს. ტელეგრამის არხზე მითითებულია, რომ სია ღიაა და შეერთება ნებისმიერ მსურველს შეუძლია.

გარდა ამისა, 150-ზე მეტმა რუსმა დეპუტატმა განაცხადა, რომ ეს არის წარმოუდგენელი სისასტიკე. დეპუტატები მოუწოდებენ რუსეთის მოსახლეობას, არ მიიღონ მონაწილეობა აგრესიაში, არ მოიწონონ იგი და არ გაჩუმდნენ.

ჩვენ — ხალხის არჩეული დეპუტატები — უპირობოდ ვგმობთ რუსული არმიის თავდასხმას უკრაინაზე. ეს არის წარმოუდგენელი სისასტიკე, რომლის გამართლება არ არსებობს და არ შეიძლება არსებობდეს", — წერია მიმართვაში

სასამართლო სხდომაზე უკრაინაში მიმდინარე ომი დაგმო რუსეთის ნომერ პირველმა ოპოზიციონერმა, ალექსეი ნავალნიმ. მისი აზრით, ეს ომი რუსეთსა და უკრაინას შორის გაჩაღებულია, რათა რუსეთის მოქალაქეთა ძარცვა გადაიფაროს და მათი ყურადღება ქვეყნის შიგნით არსებული პრობლემებიდან, ეკონომიკის დეგრადაციიდან სხვაგან გადაიტანონ.

"ეს ომი დიდი რაოდენობით ადამიანურ დანაკარგთან და ადამიანების ბედის დანგრევასთან მიგვიყვანს და გააგრძელებს ხაზს რუსეთის მოქალაქეების გაღატაკებისკენ", — თქვა მან.

კულტურის სფეროს წარმომადგენლები

უკრაინაში მიმდინარე ომს გამოეხმაურან რეჟისორები, მსახიობები, ტელეწამყვანები, მომღერლები, მწერლები, კომიკოსები, კინოკრიტიკოსები. ისინი წერენ, რომ რაც ახლა ხდება, გულს ტკენთ და სამარცხვინოა. მათი ნაწილი პირდაპირ აკრიტიკებს რუსეთის ხელისუფლებას, ნაწილი მხოლოდ ომს გმობს და რუსეთის ბრალეულობაზე არ საუბრობს.

ვალერი მელაძე

წარმოშობით ქართველმა რუსეთში მოღვაწე მომღერალმა განაცხადა, რომ დღეს მოხდა ისეთი რამ, რაც არ შეიძლებოდა და არც უნდა მომხდარიყო. მას მიმართვაში რუსეთის დანაშაულზე არ უსაუბრია და სანაცვლოდ თქვა, რომ მომხდარს ისტორია ოდესმე განსჯის და ყველაფერს თავის ადგილზე დააყენებს.

"მაგრამ დღეს მინდა გთხოვოთ, გთხოვთ, შეწყვიტოთ საომარი მოქმედებები და დასხდეთ მოლაპარაკების მაგიდასთან. ხალხს უნდა შეეძლოს მოლაპარაკება — ამისთვის მოგვცეს ენა, ამისთვის მოგვცეს ყველა შესაძლებლობა. ხალხი არ უნდა მოკვდეს. ეს უნდა შეწყდეს", — განაცხადა მელაძემ.

მაქსიმ გალკინი

"დილიდან დაუკავშირდით ნათესავებსა და მეგობრებს უკრაინიდან! სიტყვებით ვერ გადმოვცემ, რას ვგრძნობ! როგორ არის ეს ყველაფერი შესაძლებელი! ომის გამართლება არ შეიძლება! არა ომს!", — წერს კომიკოსი და ტელეწამყვანი.

ივან ურგანტი

"შიში და ტკივილი. არა ომს", — წერს ტელეწამყვანი.

სერგეი ლაზარევი

მომღერალის თქმით, რამდენიმე დღის წინ შეშინებულ 7 წლის შვილს უთხრა, რომ ომი არ იქნებოდა, დღეს კი ომი დაიწყო. ის მოუწოდებს ყველას, შეწყვიტონ ბრძოლა.

"გთხოვთ, შეწყვიტოთ ყველაფერი! ერთად! თქვი STOP! დასხედით მოლაპარაკების მაგიდასთან! მიეცით ხალხს საშუალება, იცოცხლონ!

ომს არავინ უჭერს მხარს! მინდა, რომ ჩემმა შვილებმა მშვიდობიანად იცხოვრონ! მე მინდა, ვიცხოვრო და შევქმნა მშვიდობის დროს! არა ომს!"

ალექსანდრე დოლგოპოლოვი

"უკრაინა მშვიდობიანი ქვეყანაა. ეს ჩვენი ქვეყანაა აგრესორი. ჩვენ ვიღებთ პასუხისმგებლობის ნაწილს იმ ჯოჯოხეთზე, რომელიც პუტინმა მიაყენა ჩვენს მოძმე ხალხს", — წერს კომიკოსი.

ზემფირა

მომღერალმა გამოაქვეყნა ფოტო წარწერით: "არა ომს".

აიგელ გაისინა

"უკრაინა, მშობლიურო, გვაპატიე, რომ არ ვიცით, ეს როგორ შევაჩეროთ. ეს წარმოუდგენელი, სამარცხვინო, საშინელი ომია", — წერს მომღერალი.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები შემოგვიერთდით ჯგუფში — რა ხდება უკრაინაში

გაიგეთ მეტი: