უკრაინის შეიარაღებული ძალების გენერალური შტაბის განცხადებით, რუსეთმა 5 ქალაქში აეროდრომები დაბომბა.

"5 საათიდან რუსეთის ფედერაციის შეიარაღებულმა ძალებმა ჩვენი ქვედანაყოფების ინტენსიური დაბომბვა დაიწყეს აღმოსავლეთში. ასევე, სარაკეტო დაბომბვა განახორციელეს ბორისპოლის, ოზერნის, კულბაკინოს, ჩუგუევის, კრამატორსკშის აეროდრომებზე", — ნათქვამია გაცხადებაში.

მათივე განცხადებით, სახელმწიფო თავდაცვის ძალები სრულ საბრძოლო მზადყოფნაში არიან და თავიანთ პოზიციებს ინარჩუნებენ. გენშტაბში ამბობენ, რომ სიტუაცია კონტროლს ექვემდებარება.

პუტინმა უკრაინაში ომი დაიწყო, რომელსაც თავად სპეციალურ "სამხედრო ოპერაციას" უწოდებს და მიზეზად ოკუპირებული დონეცკისა და ლუგანსკის სეპარატისტი ლიდერების "დახმარების თხოვნას" ასახელებს. ის ამტკიცებს, თითქოს ეს "ოპერაცია" არის თავდაცვა მათგან, ვინც "უკრაინა ტყვედ აიყვანა". ტრადიციულ პროპაგანდისტულ მოტივებზე პუტინი იმეორებს, რომ არ აპირებს უკრაინის ოკუპაციას და უკრაინელი ხალხის თვითგამორკვევის უფლებას უჭერს მხარს.

უკრაინის შინაგან საქმეთა მინისტრის მრჩეველის, ანტონ გონჩარენკოს განცხადებით, განხორციელდა სარაკეტო დარტყმები სამხედრო ადმინისტრაციის ცენტრებზე, აეროდრომებზე, სამხედრო საცავებზე, კიევთან, ხარკოვთან, დნეპერთან. მისივე თქმით, ხდება საზღვრის საარტილერიო დაბომბვა.

უკრაინის საგარეო საქმეთა მინისტრი, დმიტრი კულება აცხადებს, რომ რუსეთმა მათ წიანააღმდეგ სრულმასშტაბიანი ომი დაიწყო და მშვიდობიან ქალაქები იბომბება. მისი თქმით, უკრაინა თავს დაიცავს და მსოფლიომ პუტინი ახლავე უნდა შეაჩეროს.

უკრაინის პრეზიდენტმა, ვოლოდიმირ ზელენსკიმ სამხედრო მდგომარეობა გამოაცხადა. მან მოუწოდა ხალხს, არ აყვნენ პანიკას. მისი თქმით, ყველაფრისთვის მზად არიან და ყველას დაამარცხებენ.

ამავე თემაზე:

გაიგეთ მეტი: