აშშ-ის პრეზიდენტმა, ჯო ბაიდენმა ხელი მოაწერა აღმასრულებელ ბრძანებას, რომელიც უკრაინის დროებით ოკუპირებულ ტერიტორიებზე, თვითგამოცხადებულ ლუგანსკსა და დონეცკში აკრძალვებს აწესებს. ბრძანების მიხედვით, სანქციები შეეხება ახალ ინვესტიციებს, ვაჭრობასა და დაფინანსებას.

თეთრი სახლის მიერ გავრცელებული განცხადების მიხედვით, უკრაინის რეგიონებში, ე.წ. ლუგანსკისა და დონეცკის სახალხო რესპუბლიკებში იკრძალება ახალი ინვესტიციები, აშშ-ში ნებისმიერი პროდუქციის, მომსახურების ან ტექნოლოგიების პირდაპირი ან არაპირდაპირი იმპორტი, ასევე, აშშ-დან ან ამერიკის მოქალაქის მიერ ამ რეგიონებში ნებისმიერი სახის ექსპორტი.

ახალი ბრძანება ასევე გულისხმობს სანქციების დაწესებას ნებისმიერ პირზე, რომელიც ამ ტერიტორიებზე ოპერირებას გადაწყვეტს. როგორც თეთრი სახლის პრესპიკერმა 21 თებერვალს განაცხადა, ეს ზომები ცალკეა და დამატებითია იმ სწრაფ და მწვავე ეკონომიკურ სანქციებზე, რომელსაც პარტნიორებთან ერთად ამზადებენ იმ შემთხვევაში, თუ რუსეთი კიდევ შეიჭრება უკრაინაში.

ბაიდენმა გადაწყვეტილების შესახებ Twitter-ზეც დაწერა. მისი თქმით, ბრძანებას ხელი მოაწერა, რათა რუსეთს საერთაშორისო სამართლის აშკარა დარღვევით სარგებლის მიღების შანსი არ მიეცეს.

"შემდეგი ნაბიჯის შესახებ ვაგრძელებთ მჭიდრო კონსულტაციებს მოკავშირეებსა და პარტნიორებთან, უკრაინის ჩათვლით", — წერს ის.

რუსეთის პრეზიდენტმა, ვლადიმერ პუტინმა უკრაინის ოკუპირებული ტერიტორიები თვითგამოცხადებული ლუგანსკი და დონეცკი "დამოუკიდებელ რესპუბლიკებად" აღიარა. პუტინმა ეს გადწყვეტილება უკრაინის "აგრესიით" ახსნა და გასამართლებლად არაერთი პროპაგანდისტული მესიჯი გააჟღერა. მან უკრაინის ხელისუფლებას მოუწოდა, "დროულად შეწყვიტონ სამხედრო ქმედებები", წინააღმდეგ შემთხვევაში კი "ნებისმიერ სისხლისღვრაზე" პასუხისმგებლობა მათ დააკისრა.

პუტინის გადწყვეტილება მინსკის შეთანხმების უხეში დარღვევაა, რასაც უკვე გამოეხმაურნენ მსოფლიო ლიდერები. ეს ქმედება დაგმო საქართველომაც.

აღიარების შემდეგ პუტინმა უკრაინის ტერიტორიაზე ჯარები გაგზავნა, მოტივად კი ისევ "სამშვიდობო მისია" დაასახელა. პუტინი ბრძანებაში ამტკიცებს, თითქოს უკრაინის ორი რეგიონის "დამოუკიდებლობა" კონფლიქტის მშვიდობიანი რეგულირებისა და მინსკის შეთანხმების გათვალისწინებით აღიარა.

დოკუმენტში ასევე ვკითხულობთ, რომ რუსეთს საგარეო საქმეთა სამინისტროს დაევალა, დონეცკისა და ლუგანსკის "მთავრობებთან" მოამზადოს მეგობრობის და ორმხრივი ურთიერთობების შეთანხმება. პუტინის ბრძანების მიხედვით, დონეცკისა და ლუგანსკის "მმართველების" მიმართვის საფუძველზე, შეთანხმების დადებამდე "სამშვიდობო მისიით" გააგზავნიან ჯარებს.