ქრისტიანული მეტალის ბენდი, Demon Hunter Netflix-სა და AEG Presents-ს უჩივის და აცხადებს, რომ KPop Demon Hunters-ის მომავალი ტურნე ბენდის სავაჭრო უფლებებს არღვევს.

ჯგუფმა სარჩელში აღნიშნა, რომ Netflix-ის პოპულარულ ფილმზე დაფუძნებული ტურნეს ანონსმა მომხმარებლებში გაურკვევლობა გამოიწვია და მათ ბრენდს საფრთხე შეუქმნა.

"მარტივად რომ ვთქვათ, Netflix-ს არ აქვს KPOP DEMON HUNTERS-ის სავაჭრო ნიშნის გამოყენების უფლება, ისევე, როგორც არ ექნებოდა KPOP METALLICA-ს, KPOP U2-ის ან KPOP BLACK SABBATH-ის სახელის გამოყენების უფლება", — ნათქვამია სარჩელში.

Demon Hunter 2000 წელს სიეტლში ჩამოყალიბდა. ბენდმა გასულ წელს ახალი ალბომი გამოუშვა, ხოლო ოქტომბერში აშშ-ის ტურნეს დაწყებას გეგმავს.

ფოტო: Indie Vision

Netflix-მა ანიმაციური ფილმი KPop Demon Hunters, რომელიც კორეულ K-Pop ჯგუფსა და მათ დემონებთან ბრძოლაზე მოგვითხრობს, 2025 წლის ივნისში გამოუშვა. ის მალევე პლატფორმის ყველა დროის ყველაზე ყურებადი ფილმი გახდა და საუკეთესო ანიმაციური ფილმისა და საუკეთესო სიმღერის ნომინაციებში ოსკარის ჯილდოებიც მოიპოვა.

მაისში Netflix-მა AEG-სთან პარტნიორობით ფილმზე დაფუძნებული ტურნე გამოაცხადა.

ფოტო: Netflix

Demon Hunter-ის სარჩელში აღნიშნულია, რომ Netflix-ის პროექტები გაურკვევლობას გამოიწვევს და ბენდს ბაზრიდან გამოდევნის. ჯგუფის განცხადებით, მშობელმა, რომელმაც შეცდომით KPop Demon Hunters-ის ტურნეს ნაცვლად მათი კონცერტის ბილეთები შეიძინა, თანხის დაბრუნება მოითხოვა. ბენდმა ასევე მიიღო ელფოსტა პროდიუსერისგან, რომელიც ფილმის ერთ-ერთ ავტორთან ინტერვიუს ითხოვდა.

Demon Hunter სასამართლოსგან ითხოვს KPop Demon Hunters-ის გამოყენების აკრძალვას მუსიკაში, მერჩანდაიზში თუ კონცერტებში, ამასთან ერთად კი — ფულადი ზიანის ანაზღაურებას.