როგორც ჩანს, How I Met Your Mother-ის მსახიობები ისეთი ახლო მეგობრები აღარ არიან, როგორც ეს ეკრანზე ჩანს.

ჯოშ რედნორმა, რომელიც სერიალში ტედ მოსბის როლს თამაშობდა, კოლეგებთან ურთიერთობაზე ისაუბრა. როდესაც რედნორს პოდკასტში ჰკითხეს, არიან თუ არა მსახიობები კვლავ ძველებურად ახლოს, მან უპასუხა: "არა, ცოტათიც კი აღარ".

თუმცა, რედნორმა დააზუსტა, რომ მათ შორის არანაირი კონფლიქტი არ მომხდარა. მან აღნიშნა, რომ ნილ პატრიკ ჰარისი თავის პოდკასტშიც კი მიიწვია და მასთან საინტერესო საუბარი ჰქონდა. მსახიობებმა გადასაღებ მოედანზე არსებული ძველი უთანხმოებები გაიხსენეს. რედნორის თქმით, ეს საუბარი ძალიან სასარგებლო და, გარკვეულწილად, შვების მომგვრელიც აღმოჩნდა.

ფოტო: Getty

რედნორმა აღნიშნა, რომ ჯეისონ სიგელსა (მარშალი) და კობი სმულდერსს (რობინი) ხანდახან მაინც ეკონტაქტება. მსახიობის თქმით, ის და ჯეისონი ზოგჯერ ერთმანეთს მესიჯებს სწერენ, როცა გადასაღები მოედნის რაიმე სასაცილო ამბავი გაახსენდებათ, თუმცა ერთმანეთი დიდი ხანია არ უნახავთ. რაც შეეხება კობის, რედნორის პოდკასტში ის ორჯერ იყო სტუმრად. ელისონ ჰანიგანი (ლილი) 2024 წელს რედნორის ქორწილს დაესწრო, თუმცა შემდეგ აღარ შეხვედრილან.

"ეს ყველაფერი კოლეჯის წლებს ჰგავს, როცა ადამიანებთან ერთად ძალიან დატვირთულ და ემოციურ დროს ატარებ. გგონია, რომ სულ ასე იქნება და ვერ წარმოგიდგენია მათ გარეშე ყოფნა, რადგან მანამდე ყოველდღე ხედავდი. მერე კი უბრალოდ იშლებით და ყველა თავის ცხოვრებას აგრძელებს", — დასძინა რედნორმა.

რედნორის თქმით, ფანებს სურთ სჯეროდეთ, რომ მსახიობები ისევ საუკეთესო მეგობრებად რჩებიან. მსახიობის განმარტებით, კოლეგებთან ახლა ოჯახური ურთიერთობა უფრო აქვს, ვიდრე მეგობრული.

"ოჯახს ვერ ირჩევ. ჩვენ როლებზე დაგვამტკიცეს, ერთმანეთი არ აგვირჩევია. როცა ერთ გარემოში ამდენ ხანს ატარებ, სწორედ ოჯახური დინამიკა იჩენს თავს. რა თქმა უნდა, ერთმანეთის მიმართ ძალიან ღრმა და სამუდამო სიყვარული გვაკავშირებს, მაგრამ ეს ყოველდღიურ, აქტიურ ურთიერთობას არ ნიშნავს", — აღნიშნა რედნორმა.