საქართველოს განათლების, მეცნიერებისა და ახალგაზრდობის სამინისტროს გადაწყვეტილებით, მასწავლებლებს საგნობრივი გამოცდების ჩაბარება კიდევ 2028 წლამდე გადაუვადდათ.

წესის მიხედვით, გაზრდილი საათობრივი ანაზღაურების მისაღებად პედაგოგებს იმ საგნის ან სწავლების საფეხურის კომპეტენცია უნდა დაედასტურებინათ, რომელსაც ასწავლიან. უწყების ცნობით, გადავადების მიზანია მოქმედ მასწავლებლებს მიეცეთ გონივრული ვადა გამოცდების ჩასაბარებლად, ხოლო სკოლებში სასწავლო პროცესი უწყვეტად გაგრძელდეს. გარდამავალ პერიოდში საგნის გამოცდა წელიწადში ორჯერ (ზაფხულსა და ზამთარში) ჩატარდება, პედაგოგებს კი საშუალება ექნებათ პროფესიული განვითარების ცენტრის უფასო მოსამზადებელი კურსებით ისარგებლონ.

"საქართველოს განათლების, მეცნიერებისა და ახალგაზრდობის სამინისტრომ მიიღო გადაწყვეტილება მასწავლებელთა სახელფასო ანაზღაურების წესის გარკვეული მოთხოვნების ამოქმედების 2027–2028 სასწავლო წლამდე გადავადების შესახებ.

მოგეხსენებათ, 2026–2027 სასწავლო წლიდან გაზრდილი საათობრივი ანაზღაურების მისაღებად მასწავლებელს უნდა ჰქონოდა იმ საგნის/საფეხურის სწავლების დადასტურებული კომპეტენცია, რომელსაც ასწავლის. აღნიშნული მოთხოვნის მიზანი იყო მასწავლებლის კვალიფიკაციისა და საგნობრივი დატვირთვის შესაბამისობის უზრუნველყოფა.

ახალი გადაწყვეტილების თანახმად, პედაგოგთა მხარდაჭერისა და სკოლებში სასწავლო პროცესის უწყვეტობის უზრუნველყოფის მიზნით, მოქმედ მასწავლებლებს დამატებით მიეცემათ გონივრული ვადა საკუთარი კომპეტენციის დასადასტურებლად — მათ საგნის ჩაბარება 2027–2028 სასწავლო წლის დაწყებამდე მოუწევთ", — წერია განცხადებაში.

უწყების ცნობით, გარდამავალ პერიოდში მასწავლებლებს მხარდაჭერის დამატებითი მექანიზმებს შესთავაზებენ. კერძოდ, კომპეტენციის დადასტურების გამოცდები წელიწადში ორჯერ — ზაფხულსა და ზამთარში ჩატარდება. ამასთან, პედაგოგებს საშუალება ექნებათ სრულიად უფასოდ გაიარონ ინტენსიური საგნობრივი მოსამზადებელი კურსები, რომლებსაც მასწავლებელთა პროფესიული განვითარების ეროვნული ცენტრი უზრუნველყოფს.

სამინისტრო მოუწოდებს მასწავლებლებს, აქტიურად გამოიყენონ ეს პერიოდი და ისარგებლონ უფასო ტრენინგებით. პარალელურად, უწყება მუშაობს გრძელვადიან სტრატეგიაზე, რომელიც სკოლებში საკადრო დეფიციტის პრევენციასა და მართვას ისახავს მიზნად.

"გარდამავალ პერიოდში სამინისტრო მასწავლებლებს კვლავ შესთავაზებს დამატებით მხარდაჭერას. პედაგოგებს ორჯერ მიეცემათ კომპეტენციის დადასტურების შესაძლებლობა — საგნის გამოცდა მასწავლებლებისთვის, როგორც ზაფხულში, ასევე, ზამთარშიც ჩატარდება. ამავდროულად, პედაგოგებს საშუალება ექნებათ, უსასყიდლოდ გაიარონ მასწავლებელთა პროფესიული განვითარების ეროვნული ცენტრის ინტენსიური საგნობრივი მომზადების კურსები.

საქართველოს განათლების, მეცნიერებისა და ახალგაზრდობის სამინისტრო პრიორიტეტულად მიიჩნევს სასწავლო პროცესის ხარისხის თანმიმდევრულ ზრდასა და თითოეული მასწავლებლის პროფესიული სტაბილურობის, ღირსეული შრომითი პირობებისა და კვალიფიკაციის ამაღლების მხარდაჭერას. მიღებული გადაწყვეტილება სწორედ ამ მიზნებს ემსახურება: მასწავლებლებს მიეცათ დამატებითი დრო და მხარდაჭერა საკუთარი კომპეტენციის დასადასტურებლად, ხოლო სკოლებს — შესაძლებლობა, მომზადებულად შეხვდნენ ახალ მოთხოვნებს ისე, რომ გარდამავალ პერიოდში არ შეიქმნას სასწავლო პროცესის უწყვეტობის რისკი.

სამინისტრო მოუწოდებს მასწავლებლებს, მაქსიმალურად გამოიყენონ გარდამავალი პერიოდი, ისარგებლონ შეთავაზებული საგნობრივი მომზადების შესაძლებლობებით და მომავალი სასწავლო წლისთვის, პროფესიული განვითარების გზით, მოემზადონ გადავადებული მოთხოვნების ამოქმედებისთვის.

პედაგოგთა მხარდამჭერი მექანიზმების დახვეწის პარალელურად, საქართველოს განათლების, მეცნიერებისა და ახალგაზრდობის სამინისტრო აქტიურად მუშაობს მასწავლებელთა საკადრო დეფიციტის პრევენციისა და მართვის ერთიან, გრძელვადიან, სისტემურ სტრატეგიაზე, რომელიც უზრუნველყოფს არსებული საკადრო საჭიროებების დროულ იდენტიფიცირებასა და შესაძლო დეფიციტების პრევენციულ თუ ინტერვენციულ მართვას", — წერია განათლების სასმინისტროს განცხადებაში.