სახელმწიფო ინსპექტორის, ლონდა თოლორაიას განცხადებით, 1 კვირის განმავლობაში, მანამ, სანამ თანამდებობაზე იქნება, ექსპრეზიდენტ მიხეილ სააკაშვილის საქმეზე საკუთარ სიტყვას დატოვებს, თუმცა, ჯერჯერობით, არ იცის, ეს რა ფორმით მოხდება.

"მე აუცილებლად დავტოვებ ჩემს სიტყვას ამ საქმესთან დაკავშირებით. აუცილებლად ვიტყვი, პრინციპში, ერთი კვირაა ამისთვის დარჩენილი და მანამ, სანამ მე ამ პოზიციაზე ვარ, აუცილებლად ვიტყვი, რა გაკეთდა ამ საქმესთან დაკავშირებით, რა სტადიაზე რჩება გამოძიება. პრინციპში, ვთქვათ ისიც, რომ ადვოკატები სრულყოფილად ფლობენ ინფორმაციას იმასთან დაკავშირებით, რას აკეთებს სამსახური, ისინი თავიდანვე იყვნენ ჩართულები პროცესში", — განაცხადა მან ფორმულასთან.

თოლორაიას განმარტებით, საგამოძიებო უწყებები, როგორც წესი, შუალედურ დასკვნებს არ აქვეყნებენ და ეს მას შემდეგ ხდება, რაც გამოძიება დასრულდება. მისივე თქმით, გამონაკლისს უშვებს იმიტომ, რომ ინსპექტორის სამსახური რამდენიმე დღეში უქმდება.

"გამოძიების შუაში როდესაც ამბობს სათქმელს, ეს უნდა იყოს გამყარებული მტკიცებულებებით და ეს უნდა იყოს ისეთი ნათქვამი, რომელსაც წყალი არ გაუვა ისეთი მტკიცებულებებით, რომელიც შემდგომ ეტაპზე იქნება მოპოვებული. მე ამიტომ ვერიდები ხოლმე სისხლის სამართლის საქმეებზე შუალედური დასკვნების გაცემას. თუმცა, ახლა გამონაკლისი, ალბათ, იქნება იმიტომ, რომ ამ საქმეზე, რომ ამ სამსახურის გაუქმება ხდება", — ამბობს ის.

თოლორაია ამბობს, რომ მას შემდეგ, რაც ინსპექტორის სამსახურის ბაზაზე შექმნილი ერთ-ერთი უწყების ხელმძღვანელად პროკურატურის თანამშრომელი აირჩიეს, არ იცის "რა ბედი ეწევა" იმ სისხლის სამართლის საქმეებს, რომელსაც ინსპექტორი იძიებდა. მისივე შეფასებით, ახალი სამსახური პროკურატურის ერთ-ერთ დანაყოფად გადაიქცევა.

"მე არავის საწინააღმდეგო, რა თქმა უნდა, არ მაქვს, მე პერსონებს არ ვეხები, თუმცა პროკურატურა იყო ერთ-ერთი ის უწყება, რომელიც ამ სამსახურის გამოძიების პროცესში ქმნიდა გარკვეულ დაბრკოლებებს, ამიტომ, რა თქმა უნდა, კადრი, რომელიც ამ განვითარებული მოვლენების ფონზე წარმოადგენს პროკურატურას, მე ვფიქრობ, რომ გადააქცევს პროკურატურის ერთ-ერთ დანაყოფად", — თქვა მან.

მიხეილ სააკაშვილი და მისი ადვოკატები ითხოვენ, რომ ლონდა თოლორაიამ კადრები გაასაჯაროვოს. 7 თებერვალს სააკაშვილმა კადრებთან ერთად შუალედური დასკვნის გამოქვეყნებისკენაც მოუწოდა ინსპექტორს.

იმავე დღეს სახელმწიფო ინსპექტორის პრესსამსახურში ყოფილი პრეზიდენტის, მიხეილ სააკაშვილის მოთხოვნის პასუხად თქვეს, რომ კადრებს გამოაქვეყნებენ მხოლოდ იმ შემთხვევაში, თუ საფრთხე არ შეექმნება პროცესის მონაწილეთა უფლებებს, უსაფრთხოებას და არ შეაფერხებს გამოძიებას. მათივე თქმით, გამოძიების მიმდინარეობის შესახებ ინფორმაციის გამოქვეყნება, განსაკუთრებულ სიფრთხილეს საჭიროებს.

თოლორაიამ 22 იანვარს რადიო თავისუფლებასთან განმარტა, რომ თუ მიიღებენ გასაჯაროების გადაწყვეტილებას წინასწარ იქნება შეთანხმებული სააკაშვილის ადვოკატებთან. ხოლო არგასაჯაროების შემთხვევაში, თოლორაია ამბობს, რომ განუმარტავენ ამის მიზეზსაც.

პარლამენტმა ქართული ოცნების ინიცირებული კანონპროექტი სახელმწიფო ინსპექტორის სამსახურის გაუქმების შესახებ დაჩქარებულად განიხილა და გასული წლის 30 დეკემბერს დაამტკიცა. კანონპროექტის მიხედვით, უქმდება სახელმწიფო ინსპექტორის თანამდებობა და სამსახური. მის მაგივრად იქმნება ორი — სპეციალური საგამოძიებო და პერსონალურ მონაცემთა დაცვის სამსახურები.

კანონის მიღების შეჩერება მოითხოვა ევროკავშირმა, ევროპის საბჭოს ადამიანის უფლებათა კომისარმა, გაერომ, საქართველოში აკრედიტებული დიპლომატიური კორპუსის წარმომადგენლებმა, ევროპარლამენტარებმა, ამერიკის ელჩმა. ყველა მათგანმა მიუთითა, რომ დამოუკიდებელი სახელმწიფო ინსტიტუტის დაშლა ასეთი დაჩქარებული წესით, გაუმჭვირვალედ, იყო მიუღებელი და ამ კანონის მიღება უნდა დაფუძნებოდა ფართო დისკუსიებს, ღია და ღრმა განხილვებს, მათ შორის, ამ დისკუსიებში პირველ რიგში ჩართული უნდა ყოფილიყო სახელმწიფო ინსპექტორის სამსახური, რეფორმა უნდა განხორციელებულიყო ფრთხილად და თანამდებობის პირების მიმართ მსგავსი მსუსხავი ეფექტის თავიდან არიდების გზით.

ლონდა თოლორაიას შეფასებით, ეს არის შტურმი სამსახურზე, რომელიც თავის გადაწყვეტილებებს არასოდეს არავის უთანხმებდა. მისი თქმით, მმართველ პარტიას სამსახურის გაუქმების შესახებ მათთან არანაირი კომუნიკაცია არ ჰქონია. მისივე თქმით, მაშინ, როდესაც სამშობიაროდან უწყების გაძლიერების პროექტს წერდა, პარლამენტი მისი გაუქმების შესახებ კანონპროექტს ამზადებდა.