სახელმწიფო ინსპექტორის, ლონდა თოლორაიას განცხადებით, პენიტენციურიდან ყოფილი პრეზიდენტის, მიხეილ სააკაშვილის ვიდეოჩანაწერები აქვთ გამოთხოვილი, რომლებსაც ექსპერტიზა უტარდება. მისი თქმით, სწორედ ექსპერტიზის დასკვნის შემდეგ იმსჯელებენ ექსპრეზიდენტის ადვოკატების მოთხოვნაზე და მიიღებენ გადაწყვეტილებას გაასაჯაროონ თუ არა კადრები. ამის შესახებ მან რადიო თავისუფლების ეთერში ისაუბრა.

თოლორაიამ განმარტა, რომ თუ მიიღებენ გასაჯაროების გადაწყვეტილებას წინასწარ ეცნობება და იქნება შეთანხმებული სააკაშვილის ადვოკატებთან. ხოლო არგასაჯაროების შემთხვევაში, თოლორაია ამბობს, რომ განუმარტავენ ამის მიზეზსაც.

"ექსპერტიზა ჩვენ დავნიშნეთ დეკემბერში, ამ ექსპერტიზების დანიშვნაზე საქმის კურსში არიან მისი ადვოკატები, ჩვენ მათთან საკმაოდ ინტენსიური კომუნიკაცია გვაქვს, მიუხედავად იმისა, რომ ისინი დაზარალებულად არ არიან ცნობილები, რაც თქვენ იცით, რომ დამატებით სამართლებრივ უფლებებს აღმოუცენებს მათ. ჩვენ თავიდანვე ვთქვით, რომ გვექნებოდა მათთან გამოძიების მიმდინარეობისას ინფორმაციის გაცვლა, რადგან ეს არის საკმაოდ მაღალი ინტერესის საქმე და ამიტომ გვინდა, რომ ეს პროცესი მიმდინარეობდეს გამჭვირვალედ, ისე რომ არ ტოვებდეს არანაირ კითხვის ნიშანს, პირველ რიგში ადვოკატებში.

ექსპერტიზის დასკვნა ჯერჯერობით მიღებული არ გვაქვს. ამიტომ ექსპერტიზის დასკვნამდე საერთოდ საუბარი ამ ჩანაწერების გასაჯაროებაზე მე ვფიქრობ რომ არ არის სწორი. რადგან, თუ ჩვენ ამ ჩანაწერების გასაჯაროების გადაწყვეტილებას მივიღებთ, რა თქმა უნდა, საზოგადოებას უნდა ვუთხრათ — რა ჩანაწერია, არის სრულყოფილი თუ არის ნაწილი და ა.შ. იმიტომ, რომ კვლავ მანიპულაციის საშუალება ვინმეს, ან რაიმე დამატებითი აზრები არ ჩნდებოდეს არასწორი ამ ჩანაწერებთან დაკავშირებით. მას შემდეგ რაც ჩვენ მივიღებთ ამ ექსპერტიზის დასკვნას უკვე ამის შემდეგ უნდა მოხდეს გადაწყვეტილების მიღება, უნდა გასაჯაროვდეს თუ არა ეს ჩანაწერები", — თქვა თოლორაიამ.

მან ასევე ისაუბრა, რომ ჩანაწერების გამოქვეყნებაზე არსებობს სააკაშვილის თანხმობა, განსხვავებით იუსტიციის სამინისტროსა და პენიტენციურის შემთხვევაში, თუმცა აღნიშნა, რომ გასათვალისწინებელია გამოძიების ინტერესები.

"გამოძიების დასრულებამდე ჩანაწერების ან ნებისმიერი სისხლის სამართლის სამართლის გასაჯაროების შემთხვევაში, რა თქმა უნდა, ეს არის ძალიან მნიშვნელოვანი, განსაკუთრებით გამოძიების დასრულებამდე. ამან რა თქმა უნდა, არ უნდა დააზიანოს საქმის ინტერესი, ამან არ უნდა დააზიანოს საბოლოო გადაწყვეტილების მიღების პროცესი. ამიტომ ექსპერტიზის დასკვნის მიღების შემდეგ, გააჩნია რა სტადიაზე იქნება იმ პერიოდისთვის გამოძიება და ამის შემდეგ იქნება ეს გადაწყვეტილება მიღებული", — აცხადებს ის.

სახელმწიფო ინსპექტორმა ასევე თქვა, რომ შესაძლებელია, დასკვნა ვერ მიიღონ პირველ მარტამდე, რადგან ექსპერტიზა ხშირად ჭიანურდება.

"ჩვენს გამოცდილებას თუ გადავხედავთ. განსაკუთრებით როდესაც დიდი მოცულობის ვიდეოჩანაწერებზე ინიშნება ექსპერტიზა, როგორც წესი რამდენიმე თვე სჭირდება ხოლმე ამ ექსპერტიზის ჩატარებას. ყოველ შემთხვევაში ჩვენ დასკვნები მოგვდის ხოლმე თვეების დაგვიანებით. მეტსაც გეტყვით, ზოგჯერ წლის დაგვიანებითაც მოგვსვლია ექსპერტიზის დასკვნები. ამიტომ აბსოლუტურად მოსალოდნელია, რომ ექსპერტიზის დასკვნები ჩვენ ვერ გვექნება პირველი მარტისთვის", — აღნიშნა მან.

18 იანვარს ადვოკატებმა სააკაშვილის დაზარალებულად ცნობის მოთხოვნით პროკურატურაში განცხადება შეიტანეს. სწორედ იქ გააკეთა გვარამიამ განცხადება და მოუწოდა, გამოაქვეყნოს მის ხელთ არსებული ვიდეო მასალა, რაზეც ექსპრეზიდენტის თანხმობაცაა.

2021 წლის 8 ნოემბერს ექსპრეზიდენტი მიხეილ სააკაშვილი მისი და მისი ადვოკატების სურვილის საწინააღმდეგოდ რუსთავის პენიტენციური დაწესებულებიდან გლდანის ციხის საავადმყოფოში გადაიყვანეს. ეს ინფორმაცია პენიტენციურმა სამსახურმა ერთი საათის შემდეგ დაადასტურა — მას შემდეგ, რაც რუსთავის ციხიდან აფრენილი ვერტმფრენი გლდანის ციხის თავზე გამოჩნდა. უფლებადამცველებმა, ოჯახის წევრებმა და ომბუდსმენმა ერთი საათის განმავლობაში არ იცოდნენ, სად იყო სააკაშვილი.

11 ნოემბერს პენიტენციურმა სამსახურმა გაავრცელა კადრები, რომლებშიც ჩანს, რომ მიხეილ სააკაშვილი გლდანის ციხის სამკურნალო დაწესებულებაში ძალის გამოყენებით გადაჰყავთ. კადრების მიხედვით, სააკაშვილი სასწრაფო დახმარების მანქანიდან იძულებით გამოიყვანეს, ძალით შეიყვანეს შენობის დერეფნებსა და ლიფტშიც, კერძოდ, ფეხებსა და ხელებში ჩაავლეს ხელი, რა დროსაც ტანსაცმელი თითქმის გახდილი აქვს. ექსპრეზიდენტი ციხის საავადმყოფოს პალატაში უკვე წელზევით შიშველი შეიყვანეს და პირდაპირ იატაკზე დასვეს.

ამ ვიდეოს გამოქვეყნდებიდან რამდენიმე საათში პენიტენციურმა სამსახურმა მეორე ვიდეო გამოაქვეყნა, სადაც მიხეილ სააკაშვილი უკვე გაჩერებულ სასწრაფო დახმარების მანქანაშია და ამბობს, რომ არ გადმოვა. ის რუსთავის ციხეში დაბრუნებას ითხოვს. უწყება აქამდე ამტკიცებდა, რომ სააკაშვილმა რუსთავის დაწესებულება თავისი ნებით დატოვა.

გადაყვანის კადრებამდე, პენიტენციურმა 7 ნოემბერს, მიხეილ სააკაშვილის შიმშილობის 38-ე დღეს, გაავრცელა კადრები, სადაც, მათი მტკიცებით, მიხეილ სააკაშვილი "საკვებს იღებს". უწყებამ ვიდეოს გამოქვეყნება "მაღალი საზოგადოებრივი ინტერესით" ახსნა.

7 დეკემბერს სახელმწიფო ინსპექტორის სამსახურმა პენიტენციური სამსახური და იუსტიციის სამინისტრო დააჯარიმა. მათი გადაწყვეტილებით, საქართველოს იუსტიციის სამინისტროსა და სპეციალურ პენიტენციურ სამსახურს სააკაშვილის კვების რაციონის შესახებ ინფორმაციის, "საკვების" მიღების და რუსთავის ციხის დატოვების კადრების გავრცელების გამო პერსონალურ მონაცემთა დაცვის შესახებ საქართველოს კანონის 44-ე მუხლით გათვალისწინებული ადმინისტრაციული პასუხისმგებლობა დაეკისრათ.

2022 წლის 11 იანვარს კი სასამართლომ სახელმწიფო ინსპექტორის მიერ იუსტიციის სამინისტროს დაჯარიმების გადაწყვეტილება გააუქმა. მათი განცხადებით, იუსტიციის მინისტრის განცხადება და სამინისტროს მიერ გამოქვეყნებული ინფორმაცია მიხეილ სააკაშვილის კვების რაციონისა და აუდიო-ვიდეო ჩანაწერების გასაჯაროების შესახებ ემსახურებოდა სახელმწიფო და საზოგადოებრივი უსაფრთხოების დაცვის ლეგიტიმურ მიზანს და შესაბამისად პერსონალურ მონაცემთა დაცვის შესახებ კანონის მოთხოვნა არ დარღვეულა.