ჯანდაცვის მინისტრის მოადგილის, თამარ გაბუნიას განცხადებით, ომიკრონის ტალღამ დაღმასვლა დაიწყო. მისი თქმით, მომავალი კვირის დასაწყისიდან ექნებათ საშუალება შეაფასონ, გადაიარა თუ არა პიკმა.

"ომიკრონის ტალღამ დაიწყო დაღმასვლა, დადებითობის მაჩვენებლის მცირედი კლებაც, ასევე, აღინიშნება. ჩვენ კვირის ბოლომდე უნდა ვნახოთ ეს ტენდენცია რა მიმართულებით წავიდა. უკვე, მე ვფიქრობ, რომ მომდევნო კვირის დასაწყისიდან, სამშაბათი, იცით, რომ არის ის ნიშნული, როცა ჩვენ ვაფასებთ, რა მიმართულებით ვითარდება ეპიდემია, გვექნება იმის საშუალება, რომ ვთქვათ, რამდენად პიკი უკვე გადავა", — განაცხადა მან.

მინისტრის მოადგილე ამბობს, რომ ამ ეტაპზე, ვაქცინაცია შედარებით შენელებულია. როგორც გაბუნია განმარტავს, ეს, შესაძლოა, მიმდინარე პერიოდში ბევრი ადამიანის ინფიცირებით აიხსნას.

"ბევრი ადამიანი მიმდინარე პერიოდში დაინფიცირდა და ამდენად, შესაძლოა, მათ ამის გამო გადაწყვეტილება შეცვალეს, ვაქცინაციის თაობაზე. თუმცა სამომავლოდ ვაქცინაციის პროგრამა რჩება ისევ და ისევ მთავარ პრიორიტეტად", — თქვა მან.

17 თებერვლის მონაცემებით, საქართველოში კორონავირუსის 15 644 ახალი შემთხვევა დადასტურდა, გამოჯანმრთელდა — 24 110, ხოლო გარდაიცვალა 55 ადამიანი.

ბოლო 24 საათში ჯამში ჩატარდა 52 912 კვლევა ტესტით, მათ შორის, 32 295 ანტიგენ ტესტი, ხოლო 20 617 PCR ტესტი.

რაც შეეხება დადებითობის მაჩვენებელს, 15 თებერვლის მდგომარეობით, დადებითობის დღიური მაჩვენებელი არის 29,57%, ბოლო 14 დღის მანძილზე — 32,01%, ხოლო 7 დღის მანძილზე — 30,99%.