კონკურენციის სააგენტომ საავტომობილო საწვავის ბაზრის მონიტორინგის ფარგლებში 2021 წლის შუალედური ანგარიში გამოაქვეყნა, სადაც საწვავზე ფასის დადგენის ფაქტორებიც მიმოიხილა.

სააგენტოს ინფორმაციით, ჩვეულებრივ პირობებში, ქვეყანაში საცალო ფასწარმოქმნაზე რამდენიმე ძირითადი ფაქტორი მოქმედებს: საწვავის თვითღირებულება (საერთაშორისო ფასი), ლარის გაცვლითი კურსი, ფასზე ასახვის დროითი შუალედი, მოთხოვნა და ბიზნეს მოლოდინები და კონკურენტების ქცევა.

კონკურენციის სააგენტოს მიერ დასახელებულ ფაქტორებს შორის ვერ მოხვდა სახელმწიფოს მხრიდან დაწესებული გადასახადები — დღგ და აქციზი. რეალურად კი, გადასახადების მოცულობა საწვავზე ფასის დადგენისას მნიშვნელოვან როლს თამაშობს.

ამის მიუხედავად, სააგენტომ საწვავის ფასზე მოქმედი თითოუელი კომპონენტი დეტალურად განიხილა და დაადგინა, რომ მიმდინარე წლის დასაწყისში მსხვილი კომპანიებისთვის 1 ლიტრ რეგულარის ტიპის საწვავზე საბაჟო ღირებულება 1,74 ლარი, საოპერაციო დანახარჯები — 0,25 ლარი, აქციზი — 0,37 ლარი, დღგ — 0,47 ლარი, ხოლო კომპანიების ფასნამატი 0,26 ლარი იყო.

შესაბამისად, სააგენტოს ანგარიშის მიხედვით, 1 ლიტრ რეგულარის ტიპის საწვავში, რომლის ღირებულებაც მიმდინარე წლის იანვარში 3,10 ლარი იყო, სახელმწიფოს მიერ დაწესებული გადასახადების წილი 0,84 ლარია.

ფოტო: კონკურენციის სააგენტო

კონკურენციის სააგენტოს ინფორმაციით, მიმდინარე წლის 10 თებერვალის მდგომარეობით, რეგულარის ტიპის საწვავზე ფასი 2,71 ლარიდან 3,13 ლარის ფარგლებში მერყეობდა.

როგორც ცნობილია, სხვაობა ფიქსრიდება მსხვილი კომპანიების საცალო ფასსა და მცირე სეგმენტის ქსელების ფასებს შორის, რასაც სააგენტო რუსეთის ფედერაციიდან და თურქმენეთიდან შედარებით დაბალი თვითღირებულების მქონე საწვავის იმპორტით ხსნის. სააგენტო იქვე წერს, რომ ამ ტიპის საწვავის რეალიზაცია მცირე ქსელებთან ერთად ხორციელდება რიგი მსხვილი კომპანიების დონეზეც.

ფოტო: კონკურენციის სააგენტო

სააგენტოს თქმით, 2013 წლიდან ბაზარზე კონკურენტული გარემოს გაჯანსაღების კუთხით დადებითი ცვლილებები შეინიშნება. უწყება კომპანიებსა და დარგობრივ ასოციაციებს მოუწოდებს, თავი შეიკავონ საწვავის სამომავლო ფასებთან დაკავშირებული განცხადებებისგან. სააგენტო იმასაც აღნიშნავს, რომ ბოლო 4 თვეში მსხვილ კომპანიებში რეგულარის ტიპის საწვავი 17-31 თეთრის ფარგლებში არის გაძვირებული.

გაიგეთ მეტი: