რუსეთის რეაქციის შიშით ისრაელი უკრაინისთვის რკინის გუმბათის სისტემის მიყიდვაზე უარს ამბობს. Times Of Israel-ის ცნობით, კიევმა აშშ-ს სისტემის შესაძენად გასულ წელს მიმართა, თუმცა გავრცელებული ინფორმაციით, ისრაელმა ამ იდეას ვეტო დაადო.

მედია წერს, რომ უკრაინის მთავრობამ აშშ-ის პრეზიდენტის, ჯო ბაიდენის ადმინისტრაციას რკინის გუმბათის გადაცემა ოფიციალურად გასულ გაზაფხულზე სთხოვა, თუმცა გამომდინარე იქედან, რომ სისტემა აშშ-ისა და ისრაელის ერთობლივი პროექტია, მესამე მხარეს მის შესაძენად ორივეს თანხმობა სჭირდება.

გამოცემა გავრცელებულ ანგარიშზე დაყრდნობით წერს, რომ ისრაელის ოფიციალურმა პირებმა აშშ-ის ადმინისტრაციასთან არაფორმალურ საუბრებში განაცხადეს, რომ კიევისთვის რკინის გუმბათის მიყიდვას არ დათანხმდებიან, რადგან ამან, შესაძლოა, რუსეთთან ურთიერთობები დააზარალოს. მათივე განცხადებით, პარალელურად, ბოლო თვეების განმავლობაში უკრაინის მთავრობამ ისრაელს რკინის გუმბათი გადაცემაზე დათანხმების თხოვნით პირდაპირაც მიმართა.

უკრაინის პრეზიდენტმა, ვოლოდიმირ ზელენსკიმ 14 თებერვალს მოსახლეობისთვის სპეციალური ვიდეომიმართვა გაავრცელა, რომელშიც მოსალოდნელ ომზე ისაუბრა. მისი განცხადებით, ეუბნებიან, რომ 16 თებერვალს დაიწყება სამხედრო ინტერვენცია, რასაც ისინი ერთობით უპასუხებენ. კერძოდ, ზელენსკიმ განაცხადა, რომ ამ დღეს უკრაინის დროშების და ცისფერ-ყვითელი ლენტების გამოფენით შეხვდებიან და მსოფლიოს მათ ერთიანობას აჩვენებენ.

11 თებერვალს ამერიკის შეერთებული შტატების სახელმწიფო მდივანმა, ენტონი ბლინკენმა განაცხადა, რომ რუსეთი უკრაინაში, შეიძლება, ნებისმიერ დროს შეიჭრას. მოგვიანებით ეროვნული უსაფრთხოების საკითხებში აშშ-ის პრეზიდენტის მრჩეველმა, ჯეიკ სალივანმა კი მოუწოდა აშშ-ის მოქალაქეებს, დაუყოვნებლივ დატოვონ უკრაინა. ამერიკის მსგავსად სხვა ქვეყნებიც მოუწოდებენ საკუთარ მოქალაქეებს დატოვონ უკრაინა.

დღეს, 16 თებერვალს ვოლოდიმირ ზელენსკიმ მიმართვა გაავრცელა და ერს ერთიანობის დღე მიულოცა. უკრაინის პრეზიდენტმა განაცხადა, რომ არავის შეუძლია უყვარდეს უკრაინა ისე, როგორც მის მოქალაქეებს და მხოლოდ მათ შეუძლიათ დაიცვან საკუთარი ქვეყანა.