2022 წლის ოსკარის დაჯილდოების ცერემონია განსხვავებული იქნება, რადგან ორგანიზატორებმა გადაწყვიტეს, რომ მაყურებლების რჩეული ფილმიც დაასახელონ. ახალი ინიციატივის თანახმად, "მაყურებლების რჩეულ ფილმს" საჯარო ხმის მიცემა გამოავლენს.

მაყურებლებს ფავორიტი ფილმისთვის ხმის მიცემა ტვიტერზე შეუძლიათ, რისთვისაც შემდეგი ჰეშტეგი უნდა გამოიყენონ: #OscarsFanFavorite. ხმის მიცემა ოსკარის ოფიციალურ საიტზეც არის შესაძლებელი, რომელზეც გულშემატკივრებმა 2021 წლის ფავორიტი ფილმი უნდა მონიშნონ. 2022 წლის ოსკარის დაჯილდოების ცერემონიაზე კი ხმის მიცემის შედეგად გამარჯვებული ფილმი დასახელდება.

ოსკარის ბოლო დაჯილდოებების რეიტინგის კლების ფონზე ეს გადაწყვეტილება მოულოდნელი არ არის, რადგან მისი ორგანიზატორები უკვე დიდი ხანია ცდილობენ, რომ ცერემონიას უფრო დიდი აუდიტორია ჰყავდეს.

"ტვიტერთან თანამშრომლობით მოხარულები ვართ, რადგან წლევანდელ დაჯილდოებაში ასე მეტი ადამიანის ჩართვა შეგვიძლია. ოსკარის დაჯილდოების ცერემონიას გამორჩეული ფილმების მეშვეობით მთელი მსოფლიოს გაერთიანება შეუძლია. სოციალური მედია ადამიანებს შესაძლებლობას აძლევს ის საზოგადოება იპოვონ, რომელთანაც საერთო ინტერესები აქვთ და თან ოსკარის დაჯილდოებაშიც ჩაერთონ, რაც ნამდვილად ახალი გამოცდილებაა", — განაცხადა აკადემიის ციფრული მარკეტინგის მენეჯერმა ახალი ინიციატივის შესახებ.

2022 წლის ოსკარის დაჯილდოება 27 მარტს ჩატარდება, მანამდე კი ნომინანტების სრული სია ამ ბმულზე შეგიძლიათ ნახოთ.

ასევე იხილეთ: