8 თებერვალს ამერიკის კინოაკადემიამ ოსკარი 2022-ის ნომინანტები დაასახელა. უამრავ მაყურებელს გაუკვირდა, რომ ერთ-ერთ მთავარ — საუკეთესო ფილმის ნომინაციაში დასახელებულ 10 სათაურს შორის წლის ერთ-ერთ მნიშვნელოვან კინომოვლენად შეფასებული Spider-Man: No Way Home არ აღმოჩნდა. გამონაკლისი არც ცნობილი ამერიკელი ტელეწამყვანი ჯიმი კიმელია, რომელმაც უკმაყოფილება საჯაროდ გამოხატა.

"როგორ მოხდა, რომ სპაიდერმენი საუკეთესო ფილმის 10 ნომინაციას შორის არ დაასახელეს? დაივიწყეთ ის ფაქტი, რომ აშშ-ში ფილმის შემოსავალმა $750-ს გადააჭარბა და კიდევ იზრდება. საოცარი ფილმი იყო. წლის 10 საუკეთესო ფილმს შორის ვერ მოხვდა? მასში 3 სპაიდერმენი მონაწილეობდა. იმის თქმა გინდათ, რომ Don’t Look Up სპაიდერმენზე უკეთესი იყო? რა თქმა უნდა, არ იყო", — განაცხადა ტელეწამყვანმა.

ჯიმი კიმელმა არგუმენტად Rotten Tomatoes-ის შეფასებებიც მოიყვანა, რომლის მიხედვითაც Don’t Look Up-ს 46% აქვს, ხოლო Spider-Man: No Way Home-ს — 90%.

"გინდათ გაიგოთ, რა მოხდა? ხმის მიცემაში ჩართულმა პირებმა სიას შეხედეს, დაინახეს ლეონარდო დიკაპრიოსა და მერილ სტრიპის სახელები და ხმა მათ ფილმს მისცეს. ამის შემდეგ მანქანაში შვილები ჩასვეს და სპაიდერმენის სანახავად წავიდნენ. მოეწონათ, მაგრამ მას ხმა არ მისცეს", — განაცხადა ჯიმი კიმელმა.

2022 წლის ოსკარზე სპაიდერმენმა ნომინაცია მხოლოდ საუკეთესო ვიზუალური ეფექტებისთვის მოიპოვა. შედარებისთვის, Don’t Look Up-ს 4 ნომინაცია აქვს.

აღსანიშნავია, რომ ამერიკის კინოაკადემიამ ცოტა ხნის წინ წესები იმგვარად შეცვალა, რომ საუკეთესო ფილმის ტიტულის მისაღებად ბრძოლაში ჩაბმა 10 ფილმს შესძლებოდა. ბევრი ფიქრობდა, რომ აღნიშნული გადაწყვეტილება ოსკარებზე კარს სუპერგმირების შესახებ გადაღებულ ფილმებს გაუღებდა, თუმცა ასე არ მოხდა. ჯერჯერობით Black Panther და Joker ორად ორი ფილმია, რომელსაც საუკეთესო ფილმისთვის ნომინაცია აქვს მოპოვებული.

ამავე თემაზე: