მიმდინარე წლის იანვარში საქართველომ საგარეო ტურიზმიდან $114 მილიონის შემოსავალი მიიღო, რაც გასული წლის იმავე თვის მაჩვენებელს $104 მილიონით აღემატება, ხოლო 2020 წლის იანვრის თვის მაჩვენებელს $79 მილიონით ჩამორჩება.

მიმდინარე წლის პირველ თვეში ჯამურად ყველაზე მეტი თანხა მეზობელი ქვეყნებიდან შემოსულმა ტურისტებმა დახარჯეს.

ასეთია იმ ქვეყნების ჩამონათვალი, რომელთა მოქალაქეებისგანაიანვარში საქართველომ ყველაზე მეტი მოცულობის ტურისტული შემოსავალი მიიღო:

  1. რუსეთი — $18,7 მილიონი;
  2. უკრაინა — $14,2 მილიონი;
  3. თურქეთი — $12,8 მილიონი;
  4. ისრაელი — $9,1 მილიონი;
  5. საუდის არაბეთი — $5,1 მილიონი;
  6. სომხეთი — $5 მილიონი;
  7. აზერბაიჯანი — $4,9 მილიონი;
  8. ირანი — $2,8 მილიონი;
  9. ევროკავშირი — $13,6 მილიონი;
  10. დანარჩენი ქვეყნები — $27,9 მილიონი.

აქვე უნდა ითქვას, რომ უცხოური ტურიზმიდან მიღებულმა შემოსავლებმა პიკს 2019 წელს მიაღწია, როდესაც ტურიზმმა საქართველოს $3,27 მილიარდის შემოსავალი მოუტანა. პანდემიით გამოწვეული კრიზისის ფონზე 2020 წელს საქართველოში ტურიზმიდან $541,7 მილიონის, ხოლო 2021 წელს $1,25 მილიარდის შემოსავალი შემოვიდა.

რაც შეეხება ტურიზმის სხვა მაჩვენებლებს, მიმდინარე წლის იანვარში საქართველოში უცხოელი ვიზიტორების მიერ 177 072 ვიზიტი განხორციელდა, რაც 2021 წლის იმავე თვის მაჩვენებელთან შედარებით გაზრდილია 424,4%-ით, ხოლო 2020 წლის იანვართან შედარებით შემცირებულია 66,2%-ით.

2021 წელს უცხოელმა ვიზიტორებმა საქართველოში 1 721 242 ვიზიტი განახორციელეს, რაც 2020 წლის შესაბამის მონაცემთან შედარებით 13,7%-ით მეტი, ხოლო 2019 წლის მაჩვენებელთან შედარებით 77,7%-ით ნაკლებია.