საერთაშორისო გამჭირვალობა — საქართველოს ინფორმაციით, თეა წულუკიანის იუსტიციის მინისტრობის პერიოდში, უკანონო გათავისუფლებების გამო სახელმწიფოს ბიუჯეტმა 332 172 ლარი იზარალა.

ორგანიზაციის ცნობით, ამ თანხიდან 202 672 ლარი 5 დასრულებული საქმის შედეგადაა გადახდილი, ხოლო 129 500 ლარი სასამართლოში მიმდინარე საქმეებზე დაკისრებული. არასამთავრობოში ამბობენ, რომ ეს თანხა ყოველთვიურად იზრდება.

ორგანიზაცია იუსტიციის სამინისტროს სისტემიდან თეა წულუკიანის მმართველობის დროს გათავისუფლებული 18 თანამშრომლის ინტერესებს იცავს.

თეა წულუკიანი იუსტიციის მინისტრის თანამდებობას 8 წლის განმავლობაში იკავებდა. 2020 წლის არჩევნების შემდეგ ის მე-10 მოწვევის დეპუტატი გახდა და პარლამენტში განათლების, მეცნიერებისა და კულტურის კომიტეტს ხელმძღვანელობდა. 2021 წლის 19 მარტს წულუკიანი კულტურის, სპორტისა და ახალგაზრდობის მინისტრად დაინიშნა.