მას შემდეგ რაც ეკონომიკის მინისტრის პოსტზე ნათია თურნავა ლევან დავითაშვილმა ჩაანაცვლა, პრემიერმინისტრმა, ირაკლი ღარიბაშვილმა გარემოს დაცვისა და სოფლის მეურნეობის მინისტრად ოთარ შამუგია წარადგინა.

"მე წარმოგიდგენთ ბატონ ოთარ შამუგიას, რომელიც აქამდე დღეის მდგომარეობით იყო ლევანის მოადგილე. მე მინდა რამდენიმე მნიშვნელოვანი დეტალი ვუთხრა საზოგადეობას ბატონი ოთარის შესახებ. ოთარი არის დევნილი სოხუმიდან, დაიბადა სოხუმში, გაიზარდა სოხუმში, დაამთავრა სკოლა სოხუმში, შემდეგ ცხოვრობდა დევნილობაში ზუგდიდში, თბილისში და რომ იტყვიან თავისი შრომით, თავისი კეთილსინდისიერი, პატიოსანი შრომით მიაღწია მინისტრობას. ოთარმა 16 წელი იმუშავა ამ სამინისტროში, მან დეტალურად ყველაფერი იცის ძალიან კარგად თუ რა სჭირდება სოფლის მეურნეობას, გარემოს დაცვას და მე მჯერა, რომ იგი წარმატებული მინისტრი იქნება", — განაცხადა ღარიბაშვილმა.

ოთარ შამუგიამ მაღალი ნდობისთვის პრემიერმინისტრს მადლობა გადაუხადა და აღნიშნა, რომ მისთვის მინისტრობა დიდი პატივი და ამავდროულად პასუხისმგებლობაა.

გარემოს დაცვისა და სოფლის მეურნეობის ახალმა მინისტრმა 1992-1998 წლებში დაამთავრა ივანე ჯავახიშვილის სახელობის თბილისის სახელმწიფო უნივერსიტეტის სოხუმის ფილიალი ეკონომისტის სპეციალობით. 2020 წლის 25 დეკემბრიდან იკავებდა გარემოს დაცვისა და სოფლის მეურნეობის მინისტრის მოადგილის პოსტს. ასევე, იყო სოფლის განვითარების სააგენტოს დირექტორი. 2017 წლის იანვრიდან ივნისამდე შამუგია მუშაობდა სოფლის მეურნეობის სამინისტროს საფინანსო-ეკონომიკური დეპარტამენტის უფროსად.

სამინისტროს ვებგვერდზე განთავსებული ინფრომაციის თანახმად, ოთარ შამუგიამ იცის ქართული და რუსული ენები, თუმცა არ არის მითითებული იცის თუ არა ინგლისური. ამასთანავე, ახალი მინისტრი კომპიუტერული პროგრამებიდან ფლობს MS Word-ს, Excel-ს, Outlook-ს და ინტერნეტს.