8 თებერვლის ვაჭრობის შედეგად, ლარი დოლართან და ევროსთან მიმართებით კვლავ გამყარდა.

დღეს დადგენილი კურსის მიხედვით, ერთი დოლარის ღირებულება 2,92 ლარი გახდა, რაც აქამდე მოქმედ კურსთან შედარებით 2,8 თეთრით გამყარებას ნიშნავს.

აღსანიშნავია, რომ ეროვნული ვალუტა დოლართან მიმართებით ამაზე მეტად გამყარებული ბოლოს 2020 წლის მარტში იყო.

რაც შეეხება ევროს, ამ ვალუტასთან მიმართებით ლარი 3,31 თეთრით გამყარდა და ერთი ევრო 3,3338 ლარს გაუტოლდა.

ეკონომისტები ეროვნული ვალუტის დოლართან მიმართ გამყარების ერთ-ერთ ფაქტორად ფულადი გზავნილების გაზრდილ მოცულობას ასახელებენ — როგორც ცნობილია, 2021 წელს საქართველოში $2,35 მილიარდის ფულადი გზავნილი გადმოირიცხა, რაც გასულ წლებთან შედარებით რეკორდულად მაღალი მაჩვენებელია.

გარდა ამისა, ლარის გაცვლითი კურისის გამყარების ფაქტორად ეროვნული ბანკის მხრიდან გამკაცრებული მონეტარული პოლიტიკაც სახელდება. უფრო კონკრეტულად, ეროვნული ბანკი რეფინანსირების განაკვეთს ბოლო წლების მაქსიმალურ ნიშნულზე, 10,5%-ზე ინარჩუნებს — ეს ლარზე მოთხოვნას ზრდის, რაც ეროვნული ვალუტის გამყარებისთვის ხელშემწყობი ფაქტორია.

ამასთან, ექსპერტების აზრით, ეროვნული ვალუტის გამყარების პროცესში ერთ-ერთი მნიშვნელოვანი ფაქტორი მის გარშემო შექმნილი პოზიტიური მოლოდინებია.

თიბისი კაპიტალი ლარის გამყარების კიდევ ერთ ფაქტორად იანვარში ტურიზმის აღდგენის დაჩქარებას ასახელებს. კვლევაში აღნიშნულია, რომ სავალურო შემოსავლები დეკემბერში მნიშვნელოვანად გაუმჯობესდა.

"ბოლო პერიოდში სახეზეა უფრო მეტი ინვესტირება ლარის დეპოზიტებში და ამავდროულად მეტი სავალუტო დაკრედიტება, განსხვავებით იმ პერიოდებისაგან, როდესაც ორივე შემთხვევაში საპირისპირო ტენდენცია ლარის გაუფასურებას იწვევდა. წმინდა შემოდინებების მხრივ, აღსანიშნავია დეკემბრის მნიშვნელოვანი გაუმჯობესება, ისევე როგორც, თიბისის წინასწარ მონაცემებზე დაყრდნობით, იანვარში ტურიზმის აღდგენის დაჩქარება", — ნათქვამია თიბისი კაპიტალის კვლევაში.

თიბისი კაპიტალის კვლევის მიხედვით, აღნიშნული ტენდენციების გათვალისწინებითაც კი ლარის შემდგომი გამყარება ნაკლებად სავარაუდოა — კვლევის ავტორები ფიქრობენ, რომ ეროვნული ბანკი სავალუტო რეზერვებს შეისყიდის. გარდა ამისა, თიბისი კაპიტალი ლარის კურსის გამყარების ხელისშემშლელ ფაქტორად შესაძლო რეგიონულ სამხედრო კონფლიქტს ასახელებს.

სებ-ის მიერ დღეს დადგენილი გაცვლითი კურსი ხვალ, 9 თებერვალს შევა ძალაში.