ამერიკის შეერთებული შტატების ელჩის საქართველოში, კელი დეგნანის განცხადებით, იმედი აქვთ, რომ სახელმწიფო ინსპექტორისა და მონაცემთა დაცვის ხელმძღვანელების დანიშვნის პროცესი არ დაჩქარდება.

"გვქონდა ძალიან საინტერესო შეხვედრა პარლამენტის თავმჯდომარე შალვა პაპუაშვილთან. შეხვედრის განმავლობაში განვიხილეთ სხვადასხვა საკითხი, მათ შორის მისი ვიზიტი NATO-ში.

შეხვედრაზე, ასევე, განვიხილეთ სახელმწიფო ინსპექტორის სამსახურის და მონაცემთა დაცვის სამსახურის ხელმძღვანელების დანიშვნის საკითხი და იმედი გამოვთქვით, რომ ეს პროცესი წარიმართება სათანადოდ იმ ვადებში და ფარგლებში, რაც კანონითაა გათვალისწინებული, რადგან აღნიშნული სამსახურები არის ძალიან დიდი მნნიშვნელობისა და დატვირთვის მქონე ადამიანის უფლებათა დაცვის კუთხით", — განაცხადა ელჩმა პარლამენტში ჟურნალისტებთან საუბრისას.

პარლამენტმა ქართული ოცნების ინიცირებული კანონპროექტი სახელმწიფო ინსპექტორის სამსახურის გაუქმების შესახებ დაჩქარებულად განიხილა და გასული წლის 30 დეკემბერს დაამტკიცა. კანონპროექტის მიხედვით, უქმდება სახელმწიფო ინსპექტორის თანამდებობა და სამსახური. მის მაგივრად იქმნება ორი — სპეციალური საგამოძიებო და პერსონალურ მონაცემთა დაცვის სამსახურები.

კანონის მიღების შეჩერება მოითხოვა ევროკავშირმა, ევროპის საბჭოს ადამიანის უფლებათა კომისარმა, გაერომ, საქართველოში აკრედიტებული დიპლომატიური კორპუსის წარმომადგენლებმა, ევროპარლამენტარებმა, ამერიკის ელჩმა. ყველა მათგანმა მიუთითა, რომ დამოუკიდებელი სახელმწიფო ინსტიტუტის დაშლა ასეთი დაჩქარებული წესით, გაუმჭვირვალედ, იყო მიუღებელი და ამ კანონის მიღება უნდა დაფუძნებოდა ფართო დისკუსიებს, ღია და ღრმა განხილვებს, მათ შორის, ამ დისკუსიებში პირველ რიგში ჩართული უნდა ყოფილიყო სახელმწიფო ინსპექტორის სამსახური, რეფორმა უნდა განხორციელებულიყო ფრთხილად და თანამდებობის პირების მიმართ მსგავსი მსუსხავი ეფექტის თავიდან არიდების გზით.

ლონდა თოლორაიას შეფასებით, ეს არის შტურმი სამსახურზე, რომელიც თავის გადაწყვეტილებებს არასოდეს არავის უთანხმებდა. მისი თქმით, მმართველ პარტიას სამსახურის გაუქმების შესახებ მათთან არანაირი კომუნიკაცია არ ჰქონია. მისივე თქმით, მაშინ, როდესაც სამშობიაროდან უწყების გაძლიერების პროექტს წერდა, პარლამენტი მისი გაუქმების შესახებ კანონპროექტს ამზადებდა.