გასულ შაბათ-კვირას ბილი აილიშმა კონცერტი შეაჩერა, რათა იმ გულშემატკივარს დახმარებოდა, რომელსაც ინჰალატორი სჭირდებოდა.

სოციალურ მედიაში გავრცელებულ ვიდეოში ჩანს, რომ მომღერალი პირველ ადგილზე ფანების უსაფრთხოებას აყენებს. "ინჰალატორი გჭირდებათ?", — მომღერალმა შეშფოთებული თვალებით მიმართა აუდიტორიას, შემდეგ კი კონცერტის ორგანიზატორებს სთხოვა, რომ ინჰალატორი ფანისთვის მიეწოდებინათ.

"მოვიცდი, სანამ ყველა კარგად არ იქნება და მხოლოდ ამის შემდეგ გავაგრძელებ", — ამბობს მომღერალი ფანების მიერ გავრცელებულ კიდევ ერთ ვიდეოში.

შეგახსენებთ, რომ ბილი აილიში მსოფლიო ტურნეს მართავს, რომლის დამსწრეებმა COVID-19-ის სრული ვაქცინაციის დამადასტურებელი დოკუმენტი ან ბოლო 48 საათში გაკეთებული ტესტის უარყოფითი პასუხი უნდა წარმოადგინონ. გარდა ამისა, კონცერტის დამსწრეებს პირბადის ტარებაც მოეთხოვებათ, რათა მომღერალმა, მისი გუნდის წევრებმა და გულშემატკივრებმა ვირუსისგან თავი დაიცვან და ჯანმრთელობა შეინარჩუნონ.