როგორც ჩანს, HBO-ს გახმაურებულმა სერიალმა ჩერნობილი არა მხოლოდ სატელევიზიო სამყაროზე, არამედ თანამედროვე რუსეთზეც იქონია გავლენა...

რუსეთში, ტულის ოლქში, დამსვენებელმა შენიშნა, რომ ცნობილი საბჭოთა ქიმიკოსის ვალერი ლეგასოვის მემორიალურ დაფაზე, რომელიც ერთ-ერთ პანსიონატზეა გამოკრული, შეცდომით სერიალ ჩერნობილის მსახიობის ჯარედ ჰარისის ფოტოა გამოსახული. ჰარისი სერიალში სწორედ ლეგასოვის როლს ასრულებს: მეცნიერი ჩართული იყო ჩერნობილის ტრაგედიის საგამოძიებო პროცესებში.

ფოტო: Sasha Afanasieva / Facebook

Google-ის საძიებო სისტემაში ვალერი ლეგასოვს თუ დაძებნით, მეცნიერის ფოტოებთან ერთად სერიალის კადრებსაც წააწყდებით, რამაც, როგორც ჩანს, ამ ქიმიკოსის მშობლიურ მხარეში მემორიალის განთავსების იდეის ავტორები შეცდომაში შეიყვანა.

ქიმიკოსი ვალერი ლეგასოვი.

ფოტო: Express

ჯარედ ჰარისი ვალერი ლეგასოვის როლში.

ფოტო: HBO

საბჭოთა ხელისუფლებამ ვალერი ლეგასოვს ჩერნობილის ატომურ ელექტროსადგურზე მომხდარი კატასტროფის მიზეზების დადგენა დაავალა. მეცნიერმა ტრაგედიიდან ორი წლის თავზე სიცოცხლე თვითმკვლელობით დაასრულა.

ჯარედ ჰარისმა ლეგასოვის როლი HBO-ს ცნობილ სერიალში 2019 წელს შეასრულა, რამაც მას ემის დაჯილდოების, ოქროს გლობუსისა და ბრიტანული სატელევიზიო აკადემიის ნომინაციები მოუტანა. მათ შორის ამ უკანასკნელის შემთხვევაში გაიმარჯვა კიდეც.