პარლამენტის საგარეო ურთიერთობათა კომიტეტის თავმჯდომარემ, ნიკოლოზ სამხარაძემ სხდომაზე სვენ მიკსერს მიმართა თხოვნით, რომ ევროკავშირის ოფიციალური დოკუმენტებიდან ტერმინი "სამხრეთ ოსეთი" ამოიღონ, რადგან ეს სტალინისტური ტერმინია.

"როცა ჩვენ ტერმინებზე ვსაუბრობთ და მე ამ შესაძლებლობას ყოველთვის ვიყენებ, ჩვენ, თქვენ და ზოგადად, დასავლეთი ებრძვის სტალინისტურ გამოვლინებებს, ამის საწინააღმდეგოდ იყენებთ ტერმინს — "სამხრეთ ოსეთს" ყველა თქვენს დოკუმენტში, რაც ასევე სტალინისტური ტერმინია და შეიქმნა 1922 წელს, მანამდე ასეთი რამ არ არსებობდა.

ამიტომ, ჩემი თხოვნა, მოწოდებაა, არ ვიცი, ვიმსჯელოთ ერთად როგორ შეიძლება, მით უმეტეს, სახმრეთ ოსეთს, ასეთ წარმონაქმნს საქართველოს კონსტიტუცია არ იცნობს, როგორ შეიძლება, რომ ამოვიღოთ ეს ტერმინი საერთოდ თქვენი ოფიციალური დოკუმენტებიდან, მით უმეტეს, კიდევ ერთხელ ვიმეორებ, ეს არის სტალინისტური ტერმინი და არ არის, მე მგონი, სასიამოვნო, როდესაც ევროკავშირი, ან თუნდაც ნებისმიერი ჩვენი პარტნიორი სახელმწიფო სწორედ ამ სტალინის დროინდელ დასახელებას იყენებს, ამიტომ ჩემი უმორჩილესი თხოვნა იქნება, რომ ამაზე ვიფიქროთ, თუ რაიმე ჩვენ არის საჭირო ოფიციალური მიმართვა, ამას ჩვენ გავაკეთებთ", — განაცხადა კომიტეტის თავმჯდომარემ.

პარლამენტში ევროპასთან ინტეგრაციისა და საგარეო ურთიერთობათა კომიტეტების ერთობლივ სხდომაზე საქართველოს საკითხებზე ევროპარლამენტის მომხსენებელი სვენ მიკსერი სიტყვით გამოვიდა.