სახალხო დამცველი, ნინო ლომჯარია შინაგან საქმეთა სამინისტროსა და შრომის ინსპექციას ტყიბულის შახტაში მომხდარ შემთხვევაზე დროული და ეფექტიანი რეაგირებისკენ მოუწოდებს.

"დადგინდეს ტრაგედიის მიზეზები, რათა მომავალში მსგავსი შემთხვევების თავიდან არიდება შევძლოთ. ასევე, მიმართავს შრომის ინსპექციას, მიმდინარე ინსპექტირების ფარგლებში მოხდეს ყველა დარღვევის და რისკის იდენტიფიცირება და მათი გამოსწორების მიზნით ყველა კანონმდებლობით მინიჭებული ბერკეტის გამოყენება", — ნათქვამია განცხადებაში.

ლომჯარია აღნიშნავს, რომ მომხდარი ტყიბულის შახტებში დასაქმებულთა დაშავებისა და გარდაცვალების პირველი შემთხვევა არ არის. მისივე თქმით, მნიშვნელოვანია ტყიბულსა და სხვა მომეტებულ საფრთხისშემცველ ობიექტებში არსებული დარღვევების დროული იდენტიფიცირებისა და გამოსწორების მიზნით, სისტემური ინსპექტირება ჩატარდეს.

30 იანვარს, გვიან ღამით ტყიბულის შახტაში აფეთქების შედეგად 1 ადამიანი გარდაიცვალა, 8 კი დაშავდა.