ძაღლების მოყვარულთათვის კარგი სიახლე გვაქვს, თუ აქამდე, თქვენი ოთხფეხა მეგობრისთვის ტანსაცმლის გამოწერა ძვირი სიამოვნება იყო, ახლა უკვე შეგიძლიათ ქართული პროდუქცია იყიდოთ და თანხა საგრძნობლად დაზოგოთ.

მურია ძაღლების ტანსაცმლის ბრენდია, რომელიც ოთხმა მეგობარმა შექმნა.

რეჟისორი - მიშა ჩარკვიანი და მსახიობები - თეონა ლეჟავა, ნუცა გუჩაშვილი, ირაკლი კაკაბაძე, გაერთიანდნენ და ახალი ბიზნესი წამოიწყეს.

"მე და ნუცა ხშირად ვაკეთებდით ხელნაკეთ ნივთებს, ხატვა, ჭრა-კერვა და სხვა ხელსაქმე ორივეს გამოგვდის. ყველაფერი იმით დაიწყო, რომ ჩვენი მეგობრის ძაღლს, იუბილეზე მაისური შევუკერეთ და ვაჩუქეთ. თარგი ინტერნეტში ვიპოვეთ, ნაჭერი ძველ კარადაში და ხელის მანქანით შევკერეთ. ჩვენს მეგობარს ძალიან მოეწონა და გვითხრა, რომ ძალიან დიდი წვალებაა ძაღლის ტანსაცმლის ყიდვა: ქართული ბრენდი არ არსებობს, გამოწერა ძვირია, თანაც დიდი დრო სჭირდება და ძალიან კარგი იქნება თუ გავაკეთებთ ქართულ ბრენდს, რომელიც ამ მიმართულებით იმუშავებსო."

"ეს აზრი ძალიან მოგვეწონა და გადავწყვიტეთ გაგვეკეთებინა. სახელი მალევე მოვიფიქრეთ და მურია დავარქვით. ძაღლზე პირველი რაც მოგვივიდა თავში, სწორედ ეს იყო. გვინდოდა ხაზი გაგვესვა, რომ ნაწარმი ქართულია. მქონდა იდეა, რომ ჯეკაია დაგვერქვა, თუმცა ბოლოს მაინც მურიაზე შევთანხმდით და ვაპირებთ, რომ ჯეკაია ერქვას ზამთრის ხაზს, რომლის კერვასაც შემოდგომაზე შევუდგებით. ახლა ვემზადებით ზაფხულისთვის, ვკერავთ ქუდებს, პირსახოცებს, აქსესუარებს, ჩანთებს და ყველაფერს რაც დასასვენებლად წასულ მურიებს გამოადგებათ", - გვითხრა იდეის ერთ-ერთმა ავტორმა მიშა ჩარკვიანმა.

დარწმუნებული ვარ, მურიას ტანსაცმელი ძალიან მოგეწონათ, ამიტომ თუ თქვენი ოთხფეხა მეგობრის გახარება მოგინდებათ, ეწვიეთ ქართული ბრენდის ფეისბუქ გვერდს და შეუკვეთეთ მისთვის შესაფერი სამოსი.