6 მაისს, კლუბში KHIDI, WATERSHED SERIES-ს ფარგლებში, ცნობილი იტალიელი მუსიკოსი, Alessandro Cortini, ორ ქართველ მუსიკოსთან, Oimactta და რეზო ღლონტთან ერთად დაუკრავს.

ალესანდრო კორტინი, იტალიელი მულტი-ინსტრუმენტალისტი, ხმის სინთეზსა და მოდულარ სისტემებზე ორიენტირებული მუსიკოსია, რომელიც ფართო საზოგადოებამ Nine Inch Nails-ის წევრობით გაიცნო. 2005 წლიდან 2008 წლამდე, კორტინი ჯგუფთან ერთად დადიოდა ტურებზე, სადაც ძირითადად კლავიშიან ინსტრუმენტებზე უკრავდა, თუმცა ამავდროულად ასრულებდა გიტარისა და ბას-გიტარის პარტიებს. ალესანდრო კორტინიმ მონაწილეობა მიიღო Nine Inch Nails-ის ალბომების შექმნაშიც.

კორტინის მუსიკა შეიძლება მივაკუთნოთ ისეთ ჟანრებს, როგორებიცა - დრონი, ემბიენტი, ტექნო, რომელიც ერთიანდება მისთვის დამახასიათებელ ექსპერიმენტულ ჟღერადობაში.

რაც შეეხება Oimactta-ს, ეს ქართველი პროდიუსერის, ლადუკა ნინუას პროექტია, რომლის ფარგლებშიც გამოშვებული აქვს ორი EP ალბომი: Bad Trips და Tractarent. პროექტის დიდი წარმატების მიუხედავად, ლადუკა ნინუამ Oimactta შეაჩერა. 6 მაისს, კლუბში KHIDI/ხიდი, Oimactta სპეციალურად WATERSHED SERIES-სთვის შექმნილი ლაივ აქტით წარდგება მსმენელის წინაშე.

რეზო ღლონტი, ქართული ელექტრონული მუსიკის სცენის ერთ-ერთი ყველაზე გამორჩეული პროდიუსერი და საუნდ არტისტია, რომელსაც ორი ალბომი აქვს გამოშვებული.

შეგახსენებთ, რომ WATERSHED SERIES, არის კლუბი KHIDI-ს პროექტი, რომლის მიზანიც არის დაინტერესებულ მსმენელს შესთავაზოს გამორჩეულად საინტერესო ლაივ კონცერტები.

პროექტის ფარგლებში პირველი ლაივი 2016 წლის 30 სექტემბერს გაიმართა, სადაც KHIDI-ს სტუმრები ცნობილი მექსიკელი არტისტი, Murcof, იგივე Fernando Corona და ადგილობრივი მუსიკოსები: Avi Musaifi და TETE NOISE იყვნენ.