დაავადებათა კონტროლის ცენტრის დირექტორის, ამირან გამყრელიძის განცხადებით, ქვეყანაში ომიკრონის შტამი უკვე დომინანტი გახდა, თუმცა ცირკულირებს, ასევე, სხვა შტამებიც.

"ომიკრონის ცირკულაცია ქვეყანაში იზრდება. დღევანდელი ჩვენი გათვლებით, ოფიციალურად ლაბორატორიულად დადასტურებულია 1 400-მდე შემთხვევა. ლიდერობს თბილისი, შემდეგ მოდის იმერეთი, შემდეგ აჭარა ცირკულაციის პროცენტის თვალსაზრისით, მაგრამ ეს არის ლაბორატორიულად დადასტურებული შემთხვევები.

სხვადასხვა მათემატიკური მოდელირებით, დღევანდელ რეპორტში აღვრიცხეთ დადებითი შემთხვევების ქვეყანაში 70% მოდის ომიკრონზე, თბილისში ეს პროცენტი უფრო მაღალია, გახლავთ 80%, რეგიონებში გახლავთ 40-60%-ის ფარგლებში, ანუ დღეს თუ ვთვლით, რომ არის 70%, ის უკვე დომინანტია, შეგვიძლია ვთქვათ, მაგრამ ცირკულირებს, ასევე, სხვა შტამებიც", — განაცხადა გამყრელიძემ.

19 იანვრის მონაცემებით, საქართველოში კორონავირუსის 6 351 ახალი შემთხვევა დადასტურდა, გამოჯანმრთელდა 3 043, ხოლო გარდაიცვალა — 27 ადამიანი.

ბოლო 24 საათში ჩატარებული კვლევა ტესტით - 38 306, მათ შორის ანტიგენის სწრაფი ტესტით — 18 896, ხოლო PCR-ით — 19 410.

Stopcov.ge-ზე გამოქვეყნებული ინფორმაციის თანახმად დადებითობის დღიური მაჩვენებელი არის 16,58%, ბოლო 7 დღის — 11,73%, ხოლო 14 დღის — 10,9%.