თბილისის მერის, კახა კალაძის განცხადებით იმას, რომ მეტროსადგურ ვარკეთილში 2018 წელს ჩამონგრეული ჭერის რეაბილიტირება ამ დრომდე არ მომხდარა, "თავისი ახსნა აქვს". მისი განმარტებით, უსაფრთხოების შესასწავლად და მომავალში მსგავსი ინციდენტების თავიდან ასაცილებლად, კვლევები და ექსპერტიზები მიმდინარეობდა.

"ეს ყველაფერი გაკეთდა იმისთვის, რომ მაქსიმალურად დაცულები ვიყოთ, რომ არ მივიღოთ ის სავალალო შედეგი, რაც მოხდა წლების წინ. ამ პროცესში ჩართულები იყვნენ მაღალკვალიფიციური, გამოცდილი სპეციალისტები და ყველაფერი გაკეთდა იმისთვის, რომ მეტროსადგური ვარკეთილის განმეორებითი რეაბილიტაციის შემდეგ ასეთი შეცდომა აღარ განმეორდეს", — განაცხადა მან.

მისივე თქმით, მეტროსადგურის სრული რეაბილიტირებაა დაგეგმილი და მისი შესაბამისი დეტალური პროექტიც უკვე არსებობს, ამასთან, გამოცხადებულია ტენდერიც. კალაძე ამბობს, რომ სამუშოების ვადა დაახლოებით 12 თვეა და პროექტის ღირებულება 7 მილიონი ლარია.

"რაც შეეხება გამოცხადებულ ტენდერს, იმედია, ძალიან მალე გვეყოლება გამარჯვებული კომპანია და მაშინვე დაიწყება სამუშაოების განხორციელება. ჩვენ შეგვიძლია ვაჩვენოთ საზოგადოებას, თუ როგორი იქნება მეტროსადგური, როგორია პროექტი, როგორია ვიზუალური მხარე, შეგვიძლია მივაწოდოთ მედიას ინფორმაციის სახით, რომ საზოგადოებას ჰქონდეს წვდომა", — თქვა მან.

მეტროსადგურ ვარკეთილში ჭერი 2018 წლის 30 იანვარს ჩამოინგრა, შემთხვევის შედეგად 14 ადამიანი დაშავდა.