ლელოს ერთ-ერთი ლიდერის ბადრი ჯაფარიძის განცხადებით, ქართულ ოცნებასთან ექნებათ კონსულტაციები, რათა ჩაინიშნოს რიგგარეშე, საპარლამენტო სხდომა, სადაც ჯანდაცვის მინისტრს, ზურაბ აზარაშვილს დაიბარებენ და განიხილავენ სოციალურ სფეროში შექმნილ კრიზისს. მისი თქმით, თუ ქართული ოცნება მხარს დაუჭერს რიგგარეშე სხდომის ჩატარებას, ყველა ოპოზიციონერი მივა.

"ჩვენ მზად ვართ ხვალ კონსულტაციები დავიწყოთ ინტერფრაქციულად, ოპოზიციურმა ფრაქციებმა, ქართულ ოცნებასთან, რომ ჩაინიშნოს რიგგარეშე საპარლამენტო სხდომა, რომელიც განიხილავს, რა ხდება სოციალურ მუშაკებთან დაკავშირებით, რა მოხდა ქართლში. ეს ყველაფერი გვინდა გვსურს, გვაქვს ამის მზაობა, ქართულ ოცნებას შეუძლია, ეს დაბლოკოს ან მხარი დაუჭიროს. [...]

სწრაფად უნდა ჩაინიშნოს რიგგარეშე საპარლამენტო სხდომა იმისათვის, რომ სოციალურ სფეროში შექმნილი კრიზისი განვიხილოთ გვქონდეს დებატები და დავიბაროთ მინისტრი და მოვთხოვოთ პასუხები", — თქვა ჯაფარიძემ პალიტრანიუსის ეთერში.

ჯაფარიძე კრიზისის მთავარ ფაქტორად სოციალური სააგენტოს 400-მდე თანამშრომელი გაფიცვასა და სანატორიუმ ქართლში მცხოვრები დევნილების პროტესტს ასახელებს.

დღეს, 17 დეკემბერს სოციალური სააგენტოს თანამშრომლებისთვის გაფიცვის პირველი დღეა. ისინი ანაზღაურების გაზრდასა და სამუშაო პირობების გაუმჯობესებას ითხოვენ.

სანატორიუმის ყოფილ შენობაში მცხოვრები დევნილები კი საცხოვრებელ პირობებს აპროტესტებენ. მათი განცხადებით, შენობა ავარიულია და საცხოვრებლად საშიში. 16 იანვარს, სანატორიუმ ქართლის შენობასთან დევნილი გარდაიცვალა. ადგილობრივების თქმით, ის სახურავიდან გადმოხტა და თვითმკვლელობის მიზეზი მათი მოთხოვნების შეუსრულებლობაა.