უცხო ქვეყნის მოქალაქეებზე მიწის გასხვისების აკრძალვა კონსტიტუციაში არ აისახება.

კონსტიტუციის პროექტის მიხედვით, მიწაზე, როგორც განსაკუთრებული მნიშვნელობის რესურსზე, საკუთრების უფლებას აწესრიგებს კანონი.

კონსტიტუციის პროექტში საკუთრების უფლების შესახებ მუხლი ასეა ფორმულირებული:

მუხლი 17 (საკუთრების უფლება)

  1. საკუთრებისა და მემკვიდრეობის უფლება აღიარებული და დაცულია. დაუშვებელია საკუთრების, მისი შეძენის, გასხვისების ან მემკვიდრეობით მიღების საყოველთაო უფლების გაუქმება.
  2. საჯარო ინტერესებისათვის დასაშვებია ამ უფლებათა შეზღუდვა კანონით განსაზღვრულ შემთხვევებში და დადგენილი წესით.
  3. აუცილებელი საზოგადოებრივი საჭიროებისათვის საკუთრების ჩამორთმევა დასაშვებია კანონით პირდაპირ გათვალისწინებულ შემთხვევებში, სასამართლოს გადაწყვეტილებით ან ორგანული კანონით დადგენილი გადაუდებელი აუცილებლობისას, წინასწარი, სრული და სამართლიანი ანაზღაურებით. ანაზღაურება თავისუფლდება ყოველგვარი გადასახადისა და მოსაკრებლისაგან.
  4. მიწაზე, როგორც განსაკუთრებული მნიშვნელობის რესურსზე, საკუთრების უფლებას აწესრიგებს კანონი.

უცხოელებზე მიწის გასხვისების წინააღმდეგ საკონსტიტუციო კომისიის სამუშაო პროცესის დროს გამოდიოდნენ ქართული ოცნების წევრები ბექა ნაცვლიშვილი, კობა ნარჩემაშვილი და ახლა უკვე საკონსტიტუციო სასამართლოს მოსამართლე მანანა კობახიძე.

მიწის გასხვისება დაუშვებლად მიაჩნდათ პატრიოტთა ალიანსის წარმომადგენლებსაც.