სიეტლში გამართულ ყინულის ჰოკეის თამაშზე სამედიცინო უნივერსიტეტის სტუდენტის, ნადია პოპოვიჩის, ყურადღება ერთ-ერთი გუნდის აღჭურვილობის მენეჯერის კისერზე დანახულმა ხალმა მიიპყრო.

22 წლის სტუდენტმა გადაწყვიტა, უცნობი გაეფრთხილებინა, რადგან ჩათვალა, რომ ხალი კიბოს ნიშანი შეიძლება ყოფილიყო. უცნობის ყურადღების მიპყრობის შემდეგ პოპოვიჩმა ტელეფონზე ტექსტი აკრიფა და მენეჯერს მინის მეორე მხრიდან აჩვენა, რომელიც ხალხსა და გუნდის წევრებს ყოფს.

"ხალი, რომელიც კისრის უკანა მხარეს გაქვთ, შეიძლება სიმსივნის ნიშანი იყოს. გთხოვთ, ექიმთან წადით", — ეს ტექსტი აკრიფა ნადიამ.

მენეჯერმა ბრაიან ჰამილტონმა ეს შეტყობინება დაინახა და სახლში მისვლისას დააკვირდა, რომ ხალი მართლაც უჩვეულოდ გამოიყურებოდა. ის ექიმთან წავიდა და დადასტურდა, რომ სტუდენტი მართალი იყო, რადგან მას კიბო ჰქონდა.

კიბოს ადრეული გამოვლენის გამო ხალის მოშორება და განკურნება შესაძლებელი იყო. ასე შეუნარჩუნა უცნობმა ადამიანმა სიცოცხლე ჰამილტონს. მოგვიანებით მან სტუდენტის პოვნა გადაწყვიტა, რათა მადლობა გადაეხადა

პირველ იანვარს ჰამილტონმა ტვიტერზე პოსტი დადო, რომელშიც თამაშზე მომხდარი ისტორია აღწერა და იმედოვნებდა, რომ უცნობი გოგოს პოვნას შეძლებდა. პოსტი პოპოვიჩის დედამ მალევე ნახა და ამის შესახებ შვილს შეატყობინა.

პოპოვიჩს ჰამილტონის გუნდის თამაშზე წასვლა მანამდეც გადაწყვეტილი ჰქონდა, თუმცა ის შეხვედრაზე ოფიციალურადაც მიიწვიეს. პოპოვიჩმა გაიცნო კაცი, რომლის სიცოცხლეც გადაარჩინა, ხოლო თამაშში მონაწილე გუნდებმა, Canucks-მა და Kraken-მა, სტუდენტს 10000 დოლარის ოდენობით ერთობლივი სტიპენდია გადასცეს, რითაც სამედიცინო სკოლის სწავლის საფასურის გადახდას შეძლებს.