პარლამენტის თავმჯდომარის, შალვა პაპუაშვილის განცხადებით, ნაციონალურ მოძრაობასა ადრე ჰქონდა შავი სიები, ვინ უნდა მიეწვიათ კონცერტზე და ვინ არა, ახლა აქვთ — ვინ უნდა დააბულინგონ და ვინ არა. ასე ეხმაურება ის ექსპრეზიდენტ მიხეილ სააკაშვილის ინიციატივას ე.წ. შავი სიების შექმნის შესახებ.

"შავი სია, ეს ხომ ახალი არ არის, ზოგადად ცნობილი მეთოდია, მათ შორის, ნაციონალური მოძრაობის, როდესაც ხელისუფლებაში იყვნენ მაშინაც შავი სიები ჰქონდათ და ყველამ იცის ეს. შავი სიები, ვინ უნდა მიეწვიათ კონცერტზე და ვინ არა. შავი სიები, ვინ უნდა მიეღოთ სამსახურში და ვინ არა. ახლაც ოპოზიციაშიც აქვთ შავი სიები, რა თქმა უნდა, შავი სიები ვინ უნდა დააბულინგონ და ვინ არა, ვინ დაამუნათონ და ვინ არა. როდესაც ხელისუფლებაში მოვლენ მიუბრუნდებიან ამ შავ სიებს და უკვე სხვანაირად გამოიყენებენ", — თქვა პაპუაშვილმა.

მიხეილ სააკაშვილი ადამიანის უფლებათა დამრღვევთათვის და კორუფციონერებისთვის ე.წ. შავის სიის შექმნის იდეა 5 იანვარს გააჟღერა. ექსპრეზიდენტი საზოგადოებას იურისტთა ჯგუფის შექმნას სთავაზობს, რომელიც, მისი თქმით, დანაშაულის შემადგენლობას გამოიკვლევს, მტკიცებულებებს შეაგროვებს და საჯაროდ გამოაქვეყნებს.

მისივე ინიციატივის მიხედვით, ე.წ შავს სიაში მოხვედრილი ადამიანებისთვის საელჩოებმა ვიზები არ უნდა გასცენ და მათთვის პერსონალური სანქციები უნდა დააწესონ. სააკაშვილი ფიქრობს, რომ ამ იდეით მათ დასავლეთის საელჩოებს უნდა მიმართონ.

სააკაშვილის აზრით, იმ მოსამართლეებს, პროკურორებსა თუ თანამდებობის პირებს, ვინც უსამართლობა ჩაიდინა, მოქალაქეები ქუჩაში უნდა სცნობდნენ და "შესაბამისი რეაგირება ჰქონდეთ". ამასთან ექსპრეზიდენტი დასძენს, რომ უნდა შეიქმნას სპეციალური საიტი, სადაც მათი საბრალდებლო დასკვნა დაიწერება.