ბლოგინგის პლატფორმა Livejournal მომხმარებლებს ყოველდღიურად კარგავს. ამის მიზეზი კი რუსული ცენზურაა, რომელსაც პლატფორმისა რუსი მფლობელები არსებული კანონმდებლობის ფარგლებში ატარებენ.

Livejournal-მა პოპულარობა საუკუნის დასაწყისში მოიპოვა და უამრავი მომხმარებელი მოიზიდა. პლატფორმა 2007 წელს რუსულმა კომპანიამ შეიძინა, მაგრამ 2016 წლის დეკემბრამდე სერვერები ა.შ.შ.-ი იყო განთავსებული. სერვერების რუსეთში გადმოტანას კომპანიას ადგილობრივი კანონი ავალდებულებს, რომ რუსეთის მოქალაქეების პირადი ინფორმაციის შემცველი მონაცემები რუსულ სერვერებზე უნდა განათავსოს. აღნიშნულ კანონს არ დაემორჩილა რამდენიმე ამერიკული სოციალური ქსელი, მათ შორის LinkedIn, რომელიც 2016 წლის ნოემბრიდან რუსეთში დაბლოკილია. იმავე მიზეზით, შესაძლოა, Facebook და Twitter დაბლოკონ, რომლებიც ამ მონაცემების რუსეთში განთავსებაზე, ჯერ-ჯერობით, უარს ამბობენ. Apple, Google და Viber ამ კანონს ნაწილობრივ დაემორჩილნენ.

რუსული ცენზურა, რომლისაც Livejournal-ის მომხმარებლებს, და არამარტო მათ, ეშინიათ, მოიცავს პოლიტიკური სატირისა და პრო-LGBTQ კონტენტის აკრძალვას, განსაკუთრებით კი პრეზიდენტ პუტინის კარიკატურებისა და LGBTQ-ის ფერებში მისი პლაკატების გამოქვეყნებას.

კრიტიკოსები ამბობენ, რომ პუტინის ეს გადაწყვეტილება LGBTQ საზოგადოების კიდევ უფრო მეტად დისკრიმინაციას ემსახურება.

გარდა კონტენტის ცენზურისა, აღნიშნული რეგულაციებით იკრძალება ბლოგის ანონიმურად წარმოება, უხამსი ენის გამოყენება და "ექსტრემისტული მასალების" გამოქვეყნება.

Livejournal-ს დღემდე ყოველთვიურად 15 მილიონზე მეტი ადამიანი სტუმრობს. მის ბლოგერებს შორის არის ისეთი ცნობილი ადამიანი, როგორიცაა ჯორჯ მარტინი.

აღსანიშნავია ისიც, რომ ეს გადაწყვეტილება არ შეეხებათ მათ, ვისაც ad-free ანგარიში აქვს ნაყიდი, თუმცა მომხმარებლები მაინც მასობრივად ტოვებენ ბლოგს. ზოგიერთი მათგანი კი LiveJournal-ის კოდზე დაფუძნებულ ანალოგიურ პლატფორმა Dreamwidth-ზე გადადიან.

ანგარიშის გაუქმების შესახებ ოფიციალურად განაცხადეს სამეცნიერო ფანტასტიკის ჟანრის მწერლებმა ემი კაუფმანმა და ჩარლი სტროსმა.

ჩარლი სტროსმა აღნიშნულ ფაქტს ვრცელი ბლოგ-პოსტი მიუძღვნა, ხოლო ემი კაუფმანი ტვიტერზე მოკლე განცხადებით შემოიფარგლა.

განცხადება გაავრცელა ცნობილმა მწერალმა, ჟურნალისტმა და კომიკოსმა ბონი ბარტონმაც.

"დროა გავაუქმო LiveJournal-ის ჩემი ფასიანი ანგარიში" - წერს ბარტონი.

როგორც ჩანს, ჟურნალის წესების ცვლილებები 2018 წლის მარტის საპრეზიდენო არჩევნებსაც უკავშირდება. სულ ცოტა ხნის წინ ანალოგიური თავდასხმა განხორციელდა Yandex.money-ის მომხმარებლებზეც, რომლებიც პლატფორმას პოლიტიკური მიზნებისთვის იყენებდნენ და რუსეთის ოპოზიციის ლიდერს ამ გზით აფინანსებდნენ.