ნაციონალური მოძრაობის ლიდერის, ნიკა მელიას განცხადებით, საქართველოს პრეზიდენტს, სალომე ზურაბიშვილს სწორად აქვს წარმოდგენილი, როგორც ქვეყანაში შექმნილი ვითარება, ასევე, ამ მდგომარეობიდან გამოსავალი. თუმცა მისი თქმით, ბევრი რამ დამოკიდებული იქნება "რეჟიმზე". ამის შესახებ მელიამ ზურაბიშვილთან შეხვედრის შემდეგ ისაუბრა.

"ქალბატონ ზურაბიშვილს ძალიან სწორი აღწერა აქვს ქვეყანაში შექმნილ ვითარებაზე, ამის თაობაზე საჯაროდაც ისაუბრა, ჩემდა გასაკვირადაც, როდესაც აღიარებს, რომ ქვეყანაში არის სოციალური, ეკონომიკური, პოლიტიკური კრიზისი, როდესაც ქვეყნიდან გარბიან მოქალაქეები, იმიტომ, რომ მათ აქ აღარ გაეჩერებათ, დიახაც, ეს არის განსხვავებული რამ, რაც მე მომისმენია ბოლო წლების განმავლობაში, განსხვავებით იმ ადამიანებისა, რომლებიც წლების განმავლობაში ახმოვანებდნენ ბიძინა ივანიშვილის პოზიციას.

[...] და გამოსავალი როგორ აქვს ამ მძიმე მდგომარეობიდან დანახული ქალბატონ ზურაბიშვილს, ამ შეხვედრის განმავლობაში, რა თქმა უნდა, ფაქტობრივად, ყველა საკითხზე ვისაუბრეთ. მე ვფიქრობ, რომ მას გამოსავალიც სწორად აქვს წარმოდგენილი, თუმცა ბევრი რამ არის დამოკიდებული, რა თქმა უნდა, თავად რეჟიმზე და რეჟიმი რისი რეჟიმია, რომელიც საკუთარი ხელით შეიმცირებს ძალაუფლებაში ყოფნის ვადასა და დროს.

აქ მნიშვნელოვანია ქალბატონი ზურაბიშვილის პოზიცია, მას აქვს ისტორიული შანსი, ჩემი შეფასებით. მას შეუძლია დიდი და გადამწყვეტი როლი ითამაშოს ამ პროცესში, მას აქვს შესაბამისი ბერკეტები. ვფიქრობ, სწორი კომუნიკაციის პირობებში საზოგადოების აქტიურ ჯგუფებთან იგი ამ პროცესში მოიპოვებს მხარდაჭერას და ასეთ შემთხვევაში, შეიძლება, ამ პროცესიდან რამე გამოვიდეს", — აღნიშნა მელიამ.

16 დეკემბერს, პრეზიდენტმა, სალომე ზურაბიშვილმა სპეციალურ საახალწლო მიღებაზე, რომელზეც როგორც ხელისუფლება, ისე საპარლამენტო და არასაპარლამენტო ოპოზიციის წარმომადგენლები მიიწვია, ქვეყანაში არსებულ პოლარიზაციაზე ისაუბრა და მისი გადაჭრის გზად სწორედ ერთიანი ძალისხმევა დაასახელა. ზურაბიშვილის განცხადებით, შერიგება ვერ იქნება წინაპირობა, რადგან ის არის შედეგი. მისივე თქმით, პროცესი უნდა დაიწყოს მოსმენით, აზრების გაცვლით, გაგრძელდეს სიმართლის გაგებითა და შემდეგ შეიძლება, საბოლოო მიზანს მიაღწიო.

საახალწლო მიღების შემდეგ პრეზიდენტი ეროვნულ თანხმობაზე სასაუბროდ ინდივიდუალურ შეხვედრებს მართავს პოლიტიკოსებთან, რელიგიური კონფესიების წარმომადგენლებთან, არასამთავრობო ორგანიზაციის წარმომადგენლებთან, სახალხო დამცველთან და სახელმწიფო ინსპექტორთან.

გაიგე მეტი: