გერმანიაში სეზონურ სამუშაოებზე დასაქმებულები საქართველოს წინააღმდეგ თბილისის საქალაქო სასამართლოში ჩივიან. დამამცირებელი სამუშაო პირობების გამო, მოქალაქეები სახელმწიფოსგან მატერიალური და მორალური ზიანის ანაზღაურებას ითხოვენ. ერთ-ერთი მომჩივანი ჯაბა ჩაჩანიძე On.ge-ს უყვება, რომ არცერთი მათგანი ინფორმირებული არ იყო იმაზე, რომ მუშაობა გაუსაძლის პირობებში მოუწევდათ.

"სასამართლოსგან ვითხოვთ სამართალს. თქვენც კარგად ნახეთ როგორ დამამცირებელ გარემოში გვიწევდა ცხოვრება იქ. ყოველი ჩვენგანმა დიდი ემოციური და ფსიქოლოგიური სტრესი მივიღეთ. მე პირადად არაფერი არ ჩამომიტანია იქიდან და ვითხოვთ სწორედ იმ 3 თვის განმავლობაში რა თანხაც უნდა ჩამოგვეტანა, იმის ანაზღაურება დასაქმების სააგენტოს დაეკისროს. პირიქით, ვალები დაგვრჩა ყველას 1 100 ევრო ვალი ცოტა არაა, ხომ მეთანხმებით?", — გვეუბნება ჯაბა.

ის გერმანიაში მარწყვის კრეფაზე იყო დასაქმებული. წასვლამდე და ახლაც ჩაჩანიძე ხაშურის ბაზარში მუშაობს და ოჯახს ამით არჩენს.

"ხაშურში ჩემი პატარა ხილ-ბოსტნის დახლი მაქვს და ოჯახს და მშობლებს ამით ვარჩენ. თანხა, რაც გერმანიაში წასასვლელად ვისესხე აქ რომ დამეხარჯა, ბევრად უკეთ ვიქნებოდი. ამიტომ ვარ გაბრაზებული და არავის შევარჩენ ჩემი შვილის ლუკმას. არც არავისი ზედმეტი მინდა და ჩემსას შევარჩენ სხვას", — ამბობს ჯაბა ჩაჩანიძე.

დასაქმებულების მოთხოვნასთან დაკავშირებით On.ge დასაქმების სააგენტოსთან დაკავშირებას შეეცადა. მათგან პასუხის მიღების შემთხვევაში მასალა განახლდება.

გერმანიაში დასაქმებული ქართველები ივნისში გაუსაძლის საცხოვრებელ პირობებზე, მოუწესრიგებელ ოთახებსა და სველ წერტილებზე ყვებოდნენ. ისინი, ასევე, ამბობდნენ, რომ დამსაქმებელი კუთვნილ ანაზღაურებას არ აძლევდათ.

საქართველოს მოქალაქეების გერმანიაში დროებით ლეგალურ დასაქმებაზე რეგისტრაცია 15 თებერვლიდან დაიწყო. 1-დან 3 თვემდე ვადით ლეგალური დასაქმება შესაძლებელი იყო სეზონურ სამუშაოებზე სოფლის მეურნეობის სექტორში, რაც სხვადასხვა სეზონური მოსავლის აღებას გულისხმობდა.

დროებითი სეზონური დასაქმება საქართველოსა და გერმანიას შორის დადებული შეთანხმების ფარგლებში ხორციელდება.