ჯანდაცვის ჯერ კიდევ მოქმედი მინისტრის, ეკატერინე ტიკარაძის განცხადებით, მოშიმშილეები ცდილობენ, რომ პროტესტით "ყურადღება მიიქციონ". ის ამბობს, რომ სხვადასხვა ფორმის აქცია ქვეყანაში არსებულ ისედაც მძიმე პანდემიურ ვითარებას უფრო ართულებს.

"როგორც მაშინ, ასევე, ახლაც, მე მესმის, რომ გარკვეული პროტესტის სახე არის დემოკრატიის ერთ-ერთ ნიშანი საზოგადოებასა და სახელმწიფოში. მესმის, რომ ადამიანები ცდილობენ გარკვეული დაძაბულობის შემოტანას, იმისათვის, რომ ყურადღება მიიქციონ ამ პროცესში. თუმცა ვთვლი, რომ ყოველთვის არსებობს დიალოგის რესურსი და მნიშვნელოვანია, პოლიტიკაში მყოფი პირები მიმართავდნენ დიალოგს და არა სხვადასხვა ფორმის საპროტესტო აქციებს, რომელიც ისედაც ართულებს ქვეყანაში არსებულ რთულ სიტუაციას, რომელიც პანდემიიდან გამომდინარე არსებობს", — განაცხადა მან.

21 დეკემბერს მიხეილ სააკაშვილის მხარდამჭერ აქციაზე ნაციონალური მოძრაობის თავმჯდომარემ, ნიკა მელიამ მასობრივი შიმშილობა გამოაცხადა. მელიას ინფორმაციით, სააკაშვილის გათავისუფლების მოთხოვნით შიმშილობა 300-მდე ადამიანმა დაიწყო.