ექსპრეზიდენტი მიხეილ სააკაშვილი მოშიმშილეებს მიმართავს და ამბობს, რომ მსგავს თავგანწირვას დიდი ბრიტანეთისა და საბჭოთა იმპერიები ჰყავს დამარცხებული. წერილში მესამე პრეზიდენტი შიმშილობის ისტორიული ფაქტების შესახებ წერს.

"თქვენი თავგანწირვით აჩვენებთ, რომ მოლაპარაკე თავები კი არ ხართ, არამედ საკუთარ სიცოცხლეს და ჯანმრთელობას რისკავთ უსამართლობის დასამარცხებლად. ასეთ თავგანწირვას დამარცხებული ჰყავს ბრიტანეთის და საბჭოთა იმპერიები და ერთი ბოროტი ოლიგარქი რაღა გახდა", — წერს ის.

სააკშვილი, ასევე, მოშიმშილეებს მოუწოდებს, სამედიცინო კონტროლის ქვეშ მუდმივად იყვნენ და საკვები დანამატები მიიღონ. მისივე თქმით, შიმშილობის გარდა სხვა საპროტესტო აქციებიც გაგრძელდება.

"მოვუწოდებ ჩემს თანამებრძოლებს, მუდმივად იყვნენ სამედიცინო კონტროლის ქვეშ, მიიღონ მინერალური დანამატები რეგულარულად. სწორედ ამ მინერალური დანამატების დახმარებით, რაც არ არღვევს შიმშილობის პროტოკოლს, ტყვედ აყვანილმა ცნობილმა უკრაინელმა რეჟისორმა ანატოლი სენცოვმა 120 დღე გაძლო შიმშილობის რეჟიმში რუსეთის ციხეებში. იმედია ჩვენ ამდენი დრო არ დაგვჭირდება, ვინაიდან გარდა შიმშილობისა, ქვეყანას მოედება სხვა საპროტესტო აქციები მთავრობის სრული გაღორების და ხალხის ასეთი ჩაგვრის და დაცინვის ფონზე. ძალიან დიდი უსამართლობის გამო, რომელიც ყოველდღიურად ეხება თითოეულ მოქალაქეს", — აცხადებს ის.

გუშინ, 21 დეკემბერს, მიხეილ სააკაშვილის მხარდამჭერ აქციაზე ნაციონალური მოძრაობის თავმჯდომარემ, ნიკა მელია მასობრივი შიმშილობა გამოაცხადა. მელიას ინფორმაციით, სააკაშვილის გათავისუფლების მოთხოვნით 300-მდე ადამიანმა დაიწყო შიმშილობა. დღეს ნაყოფიამ განაცხადა, რომ მოშიმშილეთა სიაში 180 ადამიანია დარეგისტრირებული, თუმცა ვარაუდობს, რომ ეს რიცხვი გაიზრდება.

მიხეილ სააკაშვილის სოციალურ ქსელში წერილი გამოაქვეყნა, სადაც წერს, რომ თითოეული მოშიმშილე "ცოტნე დადიანის და სხვა ქართველი გმირების ტრადიციების გამგრძელებელია".

გაიგე მეტი: