ლტოლვილთა და განსახლების მინისტრის სოზარ სუბანის შეფასებით, პრეზიდენტის დღევანდელი სიტყვა პარლამენტში ზედაპირული იყო. ამის შესახებ, მან საზოგადოებრივ მაუწყებელთან საუბრისას თქვა.

სოზარს სუბარს მიაჩნია, რომ პრეზიდენტი უნდა მოერიდოს ისეთი "არაობიექტური" განცხადებების გაკეთებას, რომელიც სასამართლოში არსებულ კრიზისს შეეხება:

"პირველ რიგში ვიტყოდი, რომ პრეზიდენტის მოხსენება არ იყო ღრმა. პრეზიდენტი დღეს მოგეხსენებათ რომ არ არის აღმასრულებელი და არც საკანონმდებლო, იგი ერთგვარი არბიტრის როლს უნდა თამაშობდეს. შესაბამისად მისი მოხსენებაც უნდა ყოფილიყო ზოგადი მიმოხილვაც ქვეყანაში არსებული მდგომარეობის. მიმაჩნია, რომ არის საკითხები, რომელთა დაკავშირებითაც პრეზიდენტს მეტი სიფრთხილე მართებს. როდესაც იგი ამბობს, რომ სასამართლოში არის კრიზისი, ეს არის აბსოლუტური ტყუილი და არაობიექტური. პრეზიდენტი უნდა მოერიდოს ასეთ განცხადებებს. მიმაჩნია, რომ მისი სურვილი იყო ყოფილიყო უფრო მეტად კრიტიკული და ამის საფუძველი არ ჰქონდა".

საქართველოს პრეზიდენტი გიორგი მარგველაშვილი დღეს პარლამენტის პლენარულ სხდომაზე ყოველწლიური ანგარიშით წარსდგა. გამოსვლისას, იგი შეეხო ქვეყანაში არსებულ კრიმუნალურ მდგომარეობას და განაცხადა, რომ კრიმინალთან ეფექტური ბრძოლისთვის გადამწყვეტია უწყებათაშორისი და ამავე დროს, საზოგადოების გამაერთიანებელი პროგრამები.

ასევე, პრეზიდენტმა პარლამენტში სიტყვით გამოსვლისას ე.წ. მოსმენების კანონთან დაკავშირებით ისაუბრა და განაცხადა, რომ საკონსტიტუციო სასამართლოს სარჩელით მიმართავს: "მივმართავ საკონსტიტუციო სასამართლოს, განსხვავებული სტატუსით, სასამართლოს მეგობრის სტატუსით".

გიორგი მარგველაშვილმა ქვეყანაში არსებულ მედიაგარემოზე და მისი თავისუფლების მნიშვნელობაზეც გაამახვილა ყურადღება და თქვა, რომ საქართველოს მოსახლეობასთან ერთად, მედიასივრცეში არსებული სახიფათო და გაუმჭვირვალე პროცესების დასრულებას საერთაშორისო საზოგადოებაც აქტიურად ელოდება.