პრეზიდენტის საახალწლო მიღებაზე, რომელსაც სხვადასხვა კონფესიის წარმომადგენლები ესწრებოდნენ, ევანგელურ-ბაპტისტური ეკლესიის წარმომადგენლები არ მიიწვიეს. როგორც ეპისკოპოსმა, რუსუდან გოცირიძემ On.ge-ს განუცხადა, მათ მოწვევა არ მიუღიათ.

"ღონისძიებებზე, რომლებსაც აწყობს რელიგიის საკითხთა სააგენტო, ჩვენ არ ვართ მიწვეულები და არ ვმონაწილეობთ. არც გვინდა, რომ ვიყოთ მიწვეულები, იმიტომ, რომ პროტესტი გვაქვს ზოგადად ამ დაწესებულების მიმართ. რაკი პრეზიდენტი, სავარაუდოდ, სარგებლობს ვაშაყმაძის დახმარებით, ალბათ, ამიტომაც არ მიგვიწვიეს. სხვა ახსნა არ მაქვს", — ამბობს გოცირიძე.

21 დეკემბერს პრეზიდენტი სალომე ზურაბიშვილი ორბელიანების სასახლეში სხვადასხვა რელიგიური კონფესიების წარმომადგენლებს შეხვდა. საქართველოს პრეზიდენტი რელიგიურ ლიდერებს ეროვნული თანხმობის შესახებ საკუთარ ინიციატივასთან დაკავშირებით ესაუბრა.

"მე თქვენი იმედიც მაქვს, რამეთუ თქვენ ასახავთ სწორედ იმას, რომ ეს ქვეყანა იყო და იმედი მაქვს, მომავალშიც იქნება შემწყნარებლობისა და ტოლერანტობის ქვეყანა, სადაც მრავალი კონფესიები, რელიგიური თუ არარელიგიური შეხედულებები ერთად არსებობდა და ეს თანაარსებობა იყო ამ ქვეყნის საუკუნოვანი ტრადიცია", — თქვა ზურაბიშვილმა მიღებაზე.

რელიგიის საკითხთა სახელმწიფო სააგენტომ გამოაქვეყნა სია, თუ ვინ იმყოფებოდა მიღებაზე.

• რელიგიის საკითხთა სახელმწიფო სააგენტოსთან არსებული ინტერრელიგიური სათათბიროს წევრები;
• საქართველოს მართლმადიდებელი ეკლესიიდან დეკანოზი არჩილ ხაჩიძე;
• საქართველოს შეიხი, რამინ იგიდოვი;
• დასავლეთ საქართველოს მუფტი, ადამ შანთაძე;
• აღმოსავლეთ საქართველოს მუფტი, ეტიბარ ემინოვი;
• ლათინ კათოლიკეთა კავკასიის ადმინისტრაციის ხელმძღვანელი, ეპისკოპოსი ჯუზეპე პაზოტო;
• სომეხთა სამოციქულო მართლმადიდებელი ეკლესიის საქართველოს ეპარქიის წარმომადგენელი, მამა ნარეკ კუშიანი;
• თბილისის დიდი სინაგოგის თავმჯდომარე, მერაბ ჩანჩალაშვილი;
• რაბინი რახამინ მურდუხაშვილი;
• ევანგელურ-ლუთერული ეკლესიის ეპისკოპოსი, მარკუს შოხი;
• თბილისის საერთაშორისო ბაპტისტური ეკლესიის პასტორი, ჩარლზ ჰობლიცი და პასტორი კახაბერ ჩხაიძე;
• საქართველოს ბაპტისტური ეკლესიების კავშირის ეპისკოპოსი, გია კანდელაკი;
• ევანგელურ-პროტესტანტული ეკლესიის უფროსი პასტორი, გიორგი ჩიტაძე;
• საქართველოს ეზიდთა სასულიერო საბჭოს თავმჯდომარე, დიმიტრი ფირბარი;
• სახარების რწმენის ეკლესიის პასტორი, გურამ იმერლიშვილი;
• რელიგიის საკითხთა სახელმწიფო სააგენტოს თავმჯდომარე, ზაზა ვაშაყმაძე;
• სტრატეგიული კვლევის, ანალიზისა და რეგიონების სამსახურის უფროსი, ნინო ჭავჭავაძე და პროტოკოლის მენეჯერი გვანცა ცხოვრებაძე.

On.ge ცდილობს პრეზიდენტის ადმინისტრაციასთან დაკავშირებას და იმის გარკვევას, რატომ არ მიიწვიეს ევანგელურ-ბაპტისტური ეკლესიის წარმომადგენლები.