ექსპრეზიდენტი მიხეილ სააკაშვილი იუსტიციის მინისტრს, რატი ბრეგაძეს ღია წერილით მიმართავს და აცხადებს, რომ გუშინ ბადრაგებმა ფურცელზე დახატული საქართველოს დროშის ფანჯრიდან გამოფენაში ხელი შეუშალეს. მისი თქმით, "დროშის შემქმნელი პრეზიდენტისთვის დროშის აწევის აკრძალვას პუტინიც ვერ მოიფიქრებდა".

"გუშინ, ბადრაგის თანამშრომლები ხელს მიშლიდნენ ფურცელზე დახატული საქართველოს დროშის გამოფენაში და ცდილობდნენ დროშის ხელიდან გამოგლეჯას. პუტინის საქმეს რომ აკეთებთ, ეგ დიდი ხანია ვიცი. მაგრამ, დროშის შემქმნელი პრეზიდენტისთვის დროშის აწევის აკრძალვას პუტინიც ვერ მოიფიქრებდა. ტყუილად კი არ თქვა დღეს ლავროვმა, რომ ქართველებს უკვე აღარ უნდათ ნატო-ში შესვლა. აქამდე ვერასდროს ბედავდნენ ამის თქმას. ოფიციალურად ვაპროტესტებ თქვენი და თქვენი თანამშრომლების მოღალატეობრივ საქციელს და გაფრთხილებთ, რომ აუცილებლად აგებთ ამაზე პასუხს", — აცხადებს ის.

ადვოკატების ინფორმაციით, სააკაშვილს ფანჯრიდან ფურცლის ჩვენებისთვის ოქმი შეუდგინეს.

გუშინ, 21 დეკემბერს, როდესაც მიხეილ სააკაშვილის მხარდამჭერთა კოლონამ გორის ჰოსპიტალთან ჩაიარა, ექსპრეზიდენტმა მათ ფანჯრიდან ფურცელზე დახატული საქართველოს დროშა აჩვენა. შემდეგ, გიული ალასანიასთვის გამოტანებულ წერილში დაწერა, რომ ბადრაგებმა ის ძალის გამოყენებით ჩამოიყვანეს.