ნაციონალური მოძრაობის თავმჯდომარის, ნიკა მელიას განცხადებით, მასობრივ შიმშილობაში რამდენიმე ასეული ადამიანი მიიღებს მონაწილეობას. მისი თქმით, ამ ეტაპზე ოფისთან ამზადებენ ინფრასტრუქტურას მოშიმშილეებისთვის.

"ამ წუთის მდგომარეობით, სია დგება, უკვე რაც შემიძლია დავადასტურო 300-ზე მეტი ადამიანია. დარწმუნებული ვარ, რომ კიდევ ბევრი შემოუერთდება ამ პროცესს", — განაცხადა მან მთავარი არხის ეთერში.

დღეს, 21 დეკემბერს პარლამენტთან მიმდინარე აქციაზე მელიამ ექსპრეზიდენტ მიხეილ სააკაშვილის გათავისუფლების მოთხოვნით უვადო, მასობრივი შიმშილობა დააანონსა. მელია ამბობს, რომ ამ გადაწყვეტილებას დაახლოებით 2 კვირის განმავლობაში განიხილავდა და ექსპრეზიდენტმა სააკაშვილმა არ იცოდ

"მე მეგობრებთან ერთად, ძალიან ბევრ ადამიანთან ერთად და დარწმუნებული ვარ, ჩვენ ვიქნებით იმაზე მეტი, ვიდრე მავანს წარმოუდგენია, მიხეილ სააკაშვილის ტყვეობიდან გათავისუფლებისთვის ვიწყებთ ახალ საეტაპო ბრძოლას და დღეიდან ჩვენ ვაცხადებთ მასობრივ საპროტესტო შიმშილობის აქციას. ეს მძიმე გადაწყვეტილებაა, ეს კონსტიტუციური უფლებაა, ეს არაძალადობრივი მეთოდია პროტესტის გამოთქმისა, მაგრამ მძიმე", — განაცხადა მელიამ.

მისივე თქმით, მასობრივი საპროტესტო შიმშილობა დაიწყება კახეთის გზატკეცილზე, ერთიანი ნაციონალური მოძრაობის ოფისის მიმდებარე ტერიტორიაზე.