ნაციონალური მოძრაობის დეპუტატი, ხატია დეკანოიძე პრეზიდენტ სალომე ზურაბიშვილს შეხვდა. მისი თქმით, პირველი შეხვედრისას ერთმანეთს მოუსმინეს და აზრები გაცვალეს. მისივე თქით, პრეზიდენტმა თქვა, რომ გაგრძელდება შეხვედრები პარტიის სხვა წარმომადგენლებთან.

დეკანოიძის განცხადებით, პრეზიდენტს პოლიტიკურ მართლმსაჯულებაზე ესაუბრა და უთხრა, რომ ეს ქვეყნის ყველაზე დიდი პრობლემაა. როგორც მან აღნიშნა, ზურაბიშვილი იზიარებს მოსაზრებას, რომ ეს საკითხი დაბრკოლებაა და ფიქრობს, რომ ქვეყანაში ძალიან რთული ხდება დემოკრატიული პროცესების დამკვიდრება.

ჟურნალისტების კითხვის პასუხად მან აღნიშნა ისიც, რომ სიტყვა შერიგება და შეთანხმება არ გამოუყენებიათ. მისივე თქმით, დააფიქსირა როგორც თავისი, ასევე პარტიის პოზიცია, რომ შეთანხმებაზე საუბარი არ შეიძლება მაშინ, როცა ექსპრეზიდენტი ციხეშია.

"ჩვენ ვისაუბრეთ, ზოგადად, როგორ გვესმის და მოვუყევი, მე როგორ მესმის ეს საკითხი. პირველი, რა თქმა უნდა, ჩვენი ყველაზე მძიმე მოცემულობა რაც არის, ეს არის პოლიტიკური მართლმსაჯულება საქართველოს მესამე პრეზიდენტის პატიმრობა, რაც არის რეალურად ყველაზე ეუფრო მაღალი ნიშნული პოლიტიკური მართლმსაჯულებისთვის. [...]

ასევე, მე გავუზიარე და მას ვუთხარი, რომ ეს ყველაზე უფრო მძიმე მოცემულობაა, რეალურად ქმნის დაბრკოლებას ევროატლანტიკური მომავლისთვის, მაშინ, როდესაც რეგიონში არის ურთულესი ვითარება გეოპოლიტიკური თვალსაზრისით. ამაზეც ვისაუბრეთ, რამდენად მნიშვნელოვანია, რომ ჩვენ ქვეყანაში მივაღწიოთ დემოკრატიულ პროცესებს. მან მომისმინა", — განაცხადა მან.

დეკანოიძე ამბობს, რომ პრეზიდენტის წამოწყებული პროცესის მიმართ მისი განწყობა პოზიტიურია და ფრთხილი ოპტიმიზმით უყურებს. მისი თქმით, იმ ადამიანებისაც ესმის, ვინც სკეპტიკურად არის განწყობილი.

ამ წუთებში პრეზიდენტთან შესახვედრად ლევან იოსელიანი და ალეკო ელისაშვილიც მივიდნენ. როგორც ცნობილია, დღეს შეხვედრა იგეგმება ლელოს ლიდერებთანაც.

16 დეკემბერს, პრეზიდენტმა, სალომე ზურაბიშვილმა სპეციალურ საახალწლო მიღებაზე, რომელზეც როგორც ხელისუფლება, ისე საპარლამენტო და არასაპარლამენტო ოპოზიციის წარმომადგენლები მიიწვია, ქვეყანაში არსებულ პოლარიზაციაზე ისაუბრა და მისი გადაჭრის გზად სწორედ ერთიანი ძალისხმევა დაასახელა. ზურაბიშვილის განცხადებით, შერიგება ვერ იქნება წინაპირობა, რადგან ის არის შედეგი. მისივე თქმით, პროცესი უნდა დაიწყოს მოსმენით, აზრების გაცვლით, გაგრძელდეს სიმართლის გაგებითა და შემდეგ შეიძლება, საბოლოო მიზანს მიაღწიო.

მანამდე, 10 დეკემბერს, აშშ-ში, დემოკრატიის სამიტზე სიტყვით გამოსვლისას სალომე ზურაბიშვილმა განაცხადა, რომ დაიწყებს ინკლუზიურ პროცესს და ეროვნული მასშტაბის საუბარს, რომელშიც მთელი საზოგადოება იქნება ჩართული. ზურაბიშვილის თქმით, ამით მივაღწევთ უახლესი ისტორიის "საერთო აღქმას" და წავალთ წინ.

მოქმედ პრეზიდენტის გამოეხმაურა ყოფილი პრეზიდენტი, მიხეილ სააკაშვილი და მას ასევე ყოფილი პრეზიდენტის, გიორგი მარგველაშვილის იდეის შესრულება შესთავაზა. საუბარია სამივე პრეზიდენტის შეხვედრაზე. სააკაშვილმა ზურაბიშვილი და მარგველაშვილი გორის სამხედრო ჰოსპიტალში შესახვედრად მიიწვია.

იდეას გამოეხმაურა მარგველაშვილიც, რომელმაც განაცხადა, რომ სამი პრეზიდენტის შეხვედრა სწორად დანახული დინამიკაა.

France 24-თან ინტერვიუში კი ზურაბიშვილმა განაცხადა, რომ აიღო ვალდებულება, შერიგების პროცესის დაწყების.