ავატარის სერიალში, რომელსაც ნეტფლიქსი იღებს, კიდევ რამდენიმე მნიშვნელოვანი პერსონაჟის შემსრულებელი მსახიობის ვინაობა შევიტყვეთ.

ელიზაბეთ იუ ცეცხლის ბატონი ოზაის შვილს და ზუკოს დას, აზულას, განასახიერებს. პერფექციონისტი და მიზანდასახული აზულა ფანებს არცთუ კარგად ახსოვთ, რადგან იგი ტახტის მემკვიდრის ადგილის დასაკავებლად ყველაფერზეა წამსვლელი.

რაც შეეხება კიოშის ქალის მეომრების შეუპოვარ და უშიშარ ლიდერს, სუკის — სერიალში მის როლს მარია ჩჟანი შეასრულებს. სუკის დედის და კუნძულის თავგამოდებული მცველის, იუკარის, როლს თემლინ ტომიტა მოირგებს.

აი, თავად ავატარი კიოშის შემსრულებელი კი ივონ ჩეპმენი იქნება.

ამ დროისთვის ბოლო სიახლე სამხრეთის წყლის ტომის წინამძღოლისა და კატარასა და სოკას ბებიის, კანას, შემსრულებელია. მისი როლი კეისი კემპ-ჰორინეკს ერგო.

გარდა ამ სიახლეებისა, უკვე ვიცით მთავარი გმირების, ასევე აიროს, გიაცოს, ჟაოსა და ცეცხლის ბატონი ოზაის შემსრულებელი მსახიობების ვინაობაც.

ფოტო: Jacob E Mann

სერიალზე მუშაობის დაწყების შესახებ ნეტფლიქსმა თავდაპირველად 2018 წელს განაცხადა. თუმცა, გასულ წელს კომპანიას ავატარის შემქმნელებთან, მაიკლ დანტე დიმარტინოსა და ბრაიან კონიეცკოსთან, "შემოქმედებითი ხედვების აცდენის" გამო უთანხმოება მოუხდა.

"მივხვდი, რომ სერიალის შემოქმედებითი მიმართულების მართვა არ შემეძლო, თუმცა, ამაზე პასუხის გაცემა ნამდვილად შეიძლებოდა", — განაცხადა მაშინ დიმარტინომ, — "ნეტფლიქსის სერიალს კარგი პროდუქტის პოტენციალი ნამდვილად აქვს, თუმცა, დარწმუნებით შემიძლია ვთქვა, რომ ეკრანზე რაც უნდა გამოვიდეს, ის არ იქნება, რის გაკეთებასაც მე და ბრაიანი ვაპირებდით".

ნაით შიამალანის 2010 წელს გამოსული ფილმის შემდეგ ეს ავატარის პირველი "ლაივ-ექშენ" ეკრანიზაციაა. ნეტფლიქსის პროექტის შემქმნელის, ალბერტ კიმის განცხადებით, ტექნოლოგიები იმ დონემდე განვითარდა, რომ სერიალს ახლა არა მხოლოდ ანიმაციაში შექმნილის ზუსტად გადმოცემა, არამედ სამყაროსათვის სხვა ხიბლის მიცემაც კი შეუძლია.

ჯერჯერობით უცნობია, როდის იხილავს მაყურებელი სერიალს. ამჟამად გადაღებები ვანკუვერში მიმდინარეობს.