ტომ ჰოლანდმა People-თან ინტერვიუში განაცხადა, რომ სამსახიობო კარიერიდან დროებით შესვენება და ოჯახის შექმნაზე ფოკუსირება სურს. Spider-Man: No Way Home-ის მთავარი როლის შემსრულებელი გეგმავს, რომ სამომავლოდ პირად ცხოვრებას მეტი დრო დაუთმოს.

"უკვე ექვსი წელია, რაც მთლიანად კარიერაზე ვარ ორიენტირებული. მინდა დავისვენო და ოჯახის შექმნასა და იმის გარკვევაზე ვიფიქრო, თუ რა მსურს სამსახიობო სამყაროს გარეთ", — ამბობს მსახიობი.

ფოტო: MovieStillsDB

ჰოლანდის თქმით, მსახიობი რომ არ ყოფილიყო, მაშინ სკოლის მასწავლებლად იმუშავებდა, რადგან ბავშვებზე ზრუნვა ძალიან მოსწონს. "ბავშვები მიყვარს და ვერ ვითმენ, ისე ძალიან მინდა, მამა გავხდე. ქორწილსა და სხვა წვეულებებზე ყოველთვის ბავშვების მაგიდასთან ვარ. მამაჩემი შესანიშნავი მისაბაძი მაგალითი იყო და ვფიქრობ, ბავშვებზე ზრუნვის სიყვარული სწორედ მისგან მერგო", — დასძინა მან.

შეგახსენებთ, რომ ჰოლანდი Spider-Man-ის მსახიობ ზენდეიას ხვდება და წყვილმა გასულ თვეში GQ-სთან ინტერვიუში ურთიერთობა საჯაროდ დაადასტურა. ახლახან ზენდეიამ გადასაღები მოედნიდან ჰოლანდის ფოტო შემდეგ წარწერით განათავსა: "ჩემი ობობა, შენით ძალიან ვამაყობ, ზოგიერთი რამ არასდროს იცვლება და ეს ძალიან კარგია".

სანამ ჰოლანდი მსახიობობაზე უარის თქმას გადაწყვეტდა, Spider-Man: No Way Home-ის რეჟისორმა განაცხადა, რომ ტომ ჰოლანდის მონაწილეობით კიდევ სამი ნაწილის გადაღება იგეგმება. თუმცა ტომ ჰოლანდს სურს, რომ როლი სხვა მსახიობს დაუთმოს.

"არ მინდა, ჩემ გამო სხვა მსახიობი შეფერხდეს, რომელიც ამ როლს იმსახურებს. სიამოვნებით ვიხილავ Spider-Man-ის ახალ ვერსიას, რომელიც უფრო მრავალფეროვანი იქნება. ჩვენ სამი ადამიანი ობობა გვყავდა და ყველა ერთნაირები ვიყავით, ახლა კი რაღაც განსხვავებულის დროა", — განაცხადა ჰოლანდმა.

ასევე იხილეთ: