ცოტა ხნის წინ მსოფლიოში რიდლი სკოტის ახალი გახმაურებული ფილმის — გუჩის სახლის პრემიერა შედგა. იტალიური მოდის სახლის შესახებ გადაღებულ კრიმინალურ დრამას ნამდვილად ვარსკვლავური შემადგენლობა ჰყავს, რომელთაგან ერთ-ერთი ლედი გაგაა. გაგამ ფილმში მაურიციო გუჩის საბედისწერო პარტნიორის, პატრიცია რეჯიანის როლი მოირგო.

კონკრეტული პერსონაჟის გაცნობა და მისი სიღრმისეულად შესწავლა მარტივი საქმე სულაც არაა და ამისთვის მსახიობები ხშირად რადიკალურ გზებს მიმართავენ. გამონაკლისი არც ლედი გაგაა, რომლის ყოველდღიურობაზეც პატრიციას როლმა დიდი გავლენა მოახდინა.

გამოცემა Variety-სთან ინტერვიუში გაგამ გუჩის სახლის გადაღების თანმდევ სირთულეებზე ისაუბრა. იმის გარდა, რომ როლისთვის 9 თვის განმავლობაში იტალიური აქცენტით საუბრობდა, მკითხველებს ისიც გაუმხილა, რომ გადაღებებზე ფსიქიატრის დაკვირვების ქვეშ იყო.

"სახლში წყვდიადი გამყვა, რადგანაც რეჯიანის ცხოვრება სიბნელით იყო მოცული...როცა გადაღებები დასასრულს უახლოვდებოდა, ფსიქიატრთან ერთად ვმუშაობდი. ვფიქრობდი, რომ მჭირდებოდა. ვგრძნობდი, რომ ასე უფრო უსაფრთხოდ ვიქნებოდი", — ამბობს ლედი გაგა.

ლედი გაგამ ისიც დაამატა, რომ ეს ისტორია საზოგადოებას ქების მიღების ხათრით არ გაუმხილა. ის თვლის, რომ მსგავსი თავგანწირვა მსახიობებს არ მოეთხოვებათ.

"ვფიქრობ, მსახიობებმა ასეთი თავგანწირვა არ უნდა გამოიჩინონ. საკუთარ თავს მუდამ ვეკითხები, თუ რატომ ვიქცევი ასე", — ამბობს გაგა.

გაგამ აღიარა, რომ ხელოვნების სახელით განცდილი ფიზიკური ტკივილი და მენტალურ ჯანმრთელობასთან დაკავშირებული პრობლემები მისთვის უცხო არაა და ფიქრობს, რომ ხშირად ზედმეტი მოსდის.

"დახმარების თხოვნაში სამარცხვინო არაფერია. თუ ოდესმე თავს ასე იგრძნობთ, დახმარება ითხოვეთ", — მოუწოდებს გაგა მკითხველებს.

აღსანიშნავია, რომ როლმა ლედი გაგას ოქროს გლობუსის ნომინაცია მოუტანა და, დიდი ალბათობით, მას ოსკარზეც ვიხილავთ.

ამავე თემაზე: