მესამე პრეზიდენტი მიხეილ სააკაშვილი აცხადებს, რომ ნაციონალურ მოძრაობასა და ნიკა მელიაზე თავდასხმები ბიძინა ივანიშვილისა და სუს-ისთვის "სასარგებლო სამსახურია". სააკაშვილის თქმით, ნიკა მელიას მიერ 21 დეკემბერს დაანონსებული ექსპრეზიდენტის მხარდამჭერი აქცია მისთვის პიროვნულად ძალიან მნიშვნელოვანია.

"მე კარგად ვხედავ, რომ სუს ცდილობს დანერგოს უნდობლობა და განხეთქილების ილუზია შექმნას. ნაციონალურ მოძრაობასა და ნიკა მელიაზე თავდასხმები მხოლოდ ივანიშვილისა და სუს-ისთვის სასარგებლო სამსახურია. მათთვის ერთიანი ნაციონალური მოძრაობა თავისი 1 მილიონი მხარდაჭერით არის მძარცველთა ბანდის ბოგინის გარდაუვალი დასასრული. ამიტომ, ყველას გთხოვთ, გავერთიანდეთ ლიდერშიპის გარშემო 21-ში და შემდგომ დღეებში და ასევე, დავდგეთ საერთო პლატფორმაზე ყველა სხვა, დიდ თუ პატარა ჯგუფთან და აქტიურ მოქალაქესთან ერთად. ივანიშვილის ხრიკები ამჯერად ვერ იმუშავებს. ძალიან აქტიური და სიურპრიზებით აღსავსე დღეები და კვირები გველის წინ. წინანდალში ცოტა ნაადრევად მოუწიათ ბიჭებს ზეიმი", — აცხადებს ის.

სააკაშვილის თქმით, ახლა კონსოლიდაციით მრავალრიცხოვნება და გადამწყვეტი ნაბიჯები ქვეყნის და მისი სიცოცხლის გადასარჩენად ერთადერთი სწორი გზაა.

ექსპრეზიდენტ მიხეილ სააკაშვილის გათავისუფლების მოთხოვნით, 21 დეკემბერს რუსთაველის გამზირზე აქცია გაიმართება. ამის შესახებ ინფორმაცია Facebook-ში ნაციონალური მოძრაობის თავმჯდომარე ნიკა მელიამ გაავრცელა. აქცია 18:00 საათზე დაიწყება.