ქართული ოცნების ერთ-ერთი ლიდერი, სოზარ სუბარი აცხადებს, რომ პროცესების ქუჩაში გადატანით პოლარიზაცია ვერ შემცირდება და ვერც შერიგება მოხდება. ასე ეხმაურება ის ექსპრეზიდენტ მიხეილ სააკაშვილის მოწოდებას, რომელმაც მმართველ პარტიას "გონს მოსვლისკენ" და ეროვნული შერიგებისკენ მოუწოდა, წინააღმდეგ შემთხვევაში კი ბრძოლის გამძაფრება და ქართული ოცნების დამარცხება დააანონსა.

"მოიხადოს სასჯელი და მერე ვილაპარაკოთ შერიგებაზე [...] ქუჩაში როდესაც უნდათ პროცესების გადატანა, ქუჩაში პროცესების გადატანით შერიგება და პოლარიზაციის შემცირება არ ხდება. უნდა შეწყვიტონ რიგგარეშე არჩევნებზე ლაპარაკი. უნდა აღიარონ, რომ არჩევნები წააგეს. წააგეს უშეღავათოდ. უკვე მერვედ ბოლო 9 წლის განმავლობაში. თუ ასე გააგრძელებენ, აღარც მე-9 არჩევნებზე არ ექნებათ შანსი და თუ დაიწყებენ იმაზე ზრუნვას, რაც მოქალაქეებს სჭირდებათ, ამ შემთხვევაში შეიძლება ჰქონდეთ რაღაც შანსი", — განაცხადა სოზარ სუბარმა.

გარდა ამისა, სუბარმა თქვა, რომ ექსპრეზიდენტს მიაწოდებს იმ ადამიანების საკონტაქტო ნომრებს, ვისი ოჯახის წევრებიც "მისი ბრძანებით იქნენ მოკლული ქუჩაში თუ ციხეში, ნაწამები, გაუპატიურებული", დეპუტატი ამბობს, რომ სააკაშვილმა შერიგებაზე მათგან პატიების მიღების შემდეგ უნდა ისაუბროს,

"მე მივაწოდებ დოდო აფრასიძის ტელეფონის ნომერს მიხეილ სააკაშვილს, რომელმაც თვითონ აღიარა, რომ გასცა ბრძანება ოჯახის განადგურების — დაჭერის კი არა, განადგურების. შეხვდეს, დაელაპარაკოს, მოუხადოს ბოდიში და მიიღოს პატიება", — განაცხადა სუბარმა.

6 დეკემბერს მიხეილ სააკაშვილმა განაცხადა, რომ ბრძოლა გამძაფრდება და არ გაჩერდება ქართული ოცნების დამარცხებამდე. ალტერნატივად სააკაშვილი მმართველ პარტიას "გონს მოსვლას" და ეროვნულ შერიგებას სთავაზობს. მისი თქმით, "ეს ყველასთვის საუკეთესო გამოსავალია".

ხვალ, 8 დეკემბერს, პრეზიდენტის სასახლესთან აქცია დაანონსდა სახელწოდებით თავისუფლება მიშას — ეროვნული შერიგებისთვის.

"პოლიტიკური ნორმალიზაცია ვერ მოხდება სამოქალაქო თანხმობის გარეშე, და სამოქალაქო თანხმობა ვერ შედგება პრეზიდენტ სააკაშვილის გათავისუფლების გარეშე", — აცხადებენ აქციის ორგანიზატორები.

მათი მტკიცებით, აქციის მიზანი შერიგება და დაპირისპირების დასრულებაა.