საქართველოს კულტურული მემკვიდრეობის დაცვის ეროვნული სააგენტოს ხელმძღვანელის ნიკოლოზ ანთიძის შესაბამისი ბრძანებით, ნაქალაქარ ხორანთას კულტურული მემკვიდრეობის უძრავი ძეგლის სტატუსი მიენიჭა.

ხორანთა ელდარის ველზე, სამუხის ქედის დასავლეთ ძირში მდებარეობს.

"ხორანთის, იგივე ქ. ჰერეთის დაარსებას საისტორიო წყაროები ჰეროსს მიაწერენ. იგი ჰერეთის სამეფოს დედაქალაქი იყო, რომელმაც თავისი არსებობა ლეონტი მროველის მიხედვით, VIII ს-ში არაბთა შემოსევების დროს, ხოლო ვახუშტი ბაგრატიონის ცნობის თანახმად 1265 წ. ბერქა ყაენის დამანგრეველი ლაშქრობის შედეგად შეწყვიტა.

ნაქალაქარი მიკვლეული იქნა 1965 წ. საქართველოს სახელმწიფო მუზეუმის კახეთის არქეოლოგიური ექსპედიციის მიერ (ხელმძ. ლ. ჭილაშვილი). ქალაქი 10 ჰექტარზეა განფენილი. რამდენიმე უბნის გაერთიანებაა, რომლებიც ერთმანეთისგან მცირე ხევებითაა გამოყოფილი" - იუწყება საქართველოს კულტურული მემკვიდრეობის პრესსამსახური.