კარტოგრაფი, ივერი მელაშვილის განცხადებით, გარკვეული კატეგორიის ადამიანებმა ხელისუფლებაში სისტემა საკუთარ თავზე მოირგეს და ისინი თანამდებობის შენარჩუნებისთვის ყველაფერს გააკეთებენ.

"სამართალი არის ძალიან ძნელად მოსაპოვებელი ჩვენთან. პრაქტიკულად, ამას უნდა ბრძოლა. იგივე, აგერ შვილმკვდარი მშობლები მიზიან გვერდით და რას ითხოვს ეს ხალხი, აი, რა უნდათ, საერთოდ, ელემენტარული სამართლიანობა, მეტი არაფერი. ხომ ვერ გააცოცხლებს [...]

გარკვეული კატეგორიის ადამიანებს, რომლებიც ხელისუფლებაში მოკალათდნენ, ავად, კარგად, როგორ, რანაირად, აღარ აღელვებთ ეს ყველაფერი, ვეღარ ხედავენ. მათ თავისი სკამის შენარჩუნებისთვის ყველაფერს გადადებს. მათ სისტემა მოირგეს, სისტემა მოირგეს თავისთვის. სისხლის სამართლის კოდექსი ყველასთვის ერთია, თითქოს, მაგრამ არა, მოირგეს, პროკურატურა მოირგეს, მართლმსაჯულება მოირგეს და აკეთებენ იმას, რაც უნდათ და სამწუხაროდ, გასდით", — განაცხადა მელაშვილმა TV პირველის ეთერში.

მელაშვილი აღნიშნავს, რომ ხელისუფლება მსგავს მოქმედებებს მანამ გააგრძელებს, სანამ საზოგადოება ხმას არ ამოიღებს.

კარტოგრაფების საქმე

2020 წლის 29 სექტემბერს საქართველოს გენერალურმა პროკურატურამ განაცხადა, რომ 17 აგვისტოს თავდაცვის სამინისტროსგან მიიღეს ინფორმაცია, რომელიც ეხებოდა საქართველო-აზერბაიჯანის საზღვრის დელიმიტაცია-დემარკაციის კომისიის საქმიანობას. მათივე განცხადებით, დაიწყო გამოძიება, რომელიც უცხო ქვეყნისათვის საქართველოს ტერიტორიის ნაწილის გაცემისკენ მიმართული მოქმედებას ეხებოდა. როგორც უწყებაში ამბობენ, საქართველოს საზიანოდ მეზობელი ქვეყნისთვის 3 500-მდე ჰა ფართობი მიწის გადაცემის საფრთხე შეიქმნა.

2 ოქტომბერს, პირველმა არხმა გაავრცელა ინფორმაცია, რომ ორიგინალი რუკებისა, რომლის საფუძველზეც პროკურატურამ აზერბაიჯანთან საზღვრის დადგენის საქმეზე გამოძიება დაიწყო, ქართულ მხარეს ბიზნესმენმა, დავით ხიდაშელმა გადასცა. ვრცელდება ინფორმაცია იმაზეც, რომ რუკების დედნები მან რუსეთში საგარეო დაზვერვის დახმარებით მოიპოვა.

საგამოძიებო ორგანოებმა ამ საქმეზე საზღვრის დამდგენი კომისიის წევრების, ივერი მელაშვილისა და ნატალია ილიჩოვას სახლები და სამუშაო ოფისები გაჩხრიკეს. ორივე მათგანი გამოძიების დაწყებას პოლიტიკას და არჩევნებს უკავშირდება.

7 ოქტომბერს კომისიის წევრები დააკავეს. 9 ოქტომბერს კი ილიჩოვასა და მელაშვილის აღკვეთის ღონისძიების სახით სასამართლომ პატიმრობა შეუფარდა.

21 იანვარს პროკურატურამ ივერი მელაშვილის კაბინეტში ფარულად გადაღებული ვიდეომასალა გამოაქვეყნა, სადაც ბრალდებულისა და კიდევ ერთი პირის საუბარია აღბეჭდილი. პროკურორ ამირან გულუაშვილის მტკიცებით, ფარულ ჩანაწერებში ბრალდებული ივერი მელაშვილი ადასტურებს, რომ 2006 წლის აგვისტოს შეთანხმებისას დავით გარეჯის მიმდებარედ ქართულმა მხარემ საქართველოს თავდაპირველი პოზიცია უარყო.

28 იანვარს კარტოგრაფების საქმეზე ბრალდებული ივერი მელაშვილი და ნატალია ილიჩოვა გირაოს სანაცვლოდ გაათავისუფლეს.