პარტია საქართველოსთვის თავმჯდომარის მოადგილის, გიორგი ხოჯევანიშვილის განცხადებით, მოსამართლეების დანიშვნის პროცესს საზოგადოების დიდ ნაწილში ნდობა სრულად აქვს დაკარგული.

"ქართულმა ოცნებამ დღეს გააგრძელა მოსამართლეების დანიშვნის პროცესი, ეს არის ის პროცესი, რომელიც არ შეაჩერეს, ამით კიდევ უფრო მეტ კითხვას აჩენენ საზოგადოებაში, ისედაც საზოგადოების დიდ ნაწილში ნდობა სრულად დაკარგული აქვს ამ პროცესს, ამის გარდა კითხვები არის ჩვენი საერთაშორისო და სტრატეგიული პარტნიორების მხრიდან ამ პროცესთან მიმართებაში და ამ ყველაფრის გათვალისწინებით, რომ ეს არ არის გამჭვირვალე, ეს არ არის საზოგადოების და თანამედროვე სტანდარტების შესაბამისი პროცესი, ჩვენ ბუნებრივია აღნიშნულ კანდიდატებს მხარი არ დავუჭირეთ.

რაც შეეხება კონკრეტულ მოსამართლეებს, რა თქმა უნდა ჩვენი გუნდი, რომელიც პარლამენტში ვართ წარმოდგენილი სრულად ყველა მოსამართლის განხილვას ესწრებოდა და არც ერთ კითხვაზე, რომელიც ჩვენი მხრიდან დაისვა არ მიგვიღია სათანადო, გონივრული და ადეკვატური პასუხები", — ამბობს ის.

პარლამენტმა უზენაესი სასამართლოს 4 მოსამართლე უვადოდ დაამტკიცა. კენჭი უყარეს გენადი მაკარიძეს, თამარ ოქროპირიძეს, ნინო სანდოძეს და თეა ძიმისტარაშვილს დანიშვნას. მაკარიძეს, ოქტოპირიძესა და ძიმისტარაშვილს მხარი დაუჭირა 81-მა დეპუტატმა, ნინო სანდოძეს კი — 80-მა. ოთხივე მათგანის არჩევის წინააღმდეგი 5 დეპუტატი იყო.

26-27 ნოემბერს პარლამენტში უზენაესი სასამართლოს კანიდატებს მოუსმინეს. ევროკავშირის ელჩი მოსმენას არ დაესწრო და თქვა, რომ მოსამართლეთა არჩევის პროცესი არ არის შესაბამისობაში შარლ მიშელის შეთანხმებასა და მაკროფინანსური დახმარების მიღების სანაცვლოდ წაყენებულ პირობებთან. პროცესს გამოეხმაურა აშშ-ის საელჩოც. ისინი წუხდნენ, რომ მოსამართლეების დანიშვნა იუსტიციის უმაღლესი საბჭოს არამოსამართლე წევრების მონაწილეობის გარეშე მიმდინარეობს.

აღსანიშნავია, რომ, შარლ მიშელის შეთანხმების ერთ-ერთი მთავარი პუნქტი სასამართლო რეფორმას ეხებოდა. შეთანხმების მიხედვით, არსებული წესით უზენაეს სასამართლოში მოსამართლეების დანიშვნისგან თავი უნდა შეეკავებინათ. ამის მიუხედავად, პარლამენტმა სასამართლოს მოსამართლეობის 6 კანდიდატი უვადოდ დაამტკიცა. პარალელურად კი, ქართული ოცნება აცხადებდა, რომ შარლ მიშელის დოკუმენტი მათი მხრიდან სრულდება. იმის საილუსტრაციოდ, რომ შეთანხმებაში ნამდვილად ეწერა უზენაესი სასამართლოს მოსამართლეების დანიშვნებისგან თავის შეკავების შესახებ, ამერიკის საელჩომ ტვიტერზე გამოაქვეყნა დოკუმენტის ფოტო, სადაც შეთანხმების ეს ნაწილი ყვითლად არის გახაზული.

ამის შემდეგ იყო ევროკავშირის წარმომადგენლის განცხადება იმის შესახებ, რომ საქართველომ მაკროფინანსური დახმარების მიღების პირობები ვერ შეასრულა. ჟულიენ კრამპის თქმით, ამ განცხადებამდე ქართული ოცნების ხელისუფლება აქტიურად საუბრობდა იმაზე, რომ ევროკავშირისგან მაკროფინანსური დახმარების მეორე ნაწილზე უარს ამბობენ, რადგან მთავრობამ დაიწყო საგარეო ვალის შემცირება და ამ თანხის მიღების აუცილებლობა აღარ არის.

ამასთანავე, ეუთოს დემოკრატიული ინსტიტუტებისა და ადამიანის უფლებათა ოფისის (ODIHR) მიერ გამოქვეყნებული ანგარიშის მიხედვით, საქართველოს უზენაესი სასამართლოს მოსამართლეობის კანდიდატების წარდგენის პროცესში გამოვლენილმა ხარვეზებმა ქვეყანაში სასამართლო სისტემის დამოუკიდებლობის საკითხი რისკის ქვეშ დააყენა.