გიგი უგულავა 3 000 ლარით დააჯარიმეს და სასამართლო დარბაზიდან გაათავისუფლეს. გადაწყვეტილების მიღების შემდეგ უგულავამ განაცხადა, რომ ხელისუფლების "ბრუტალურ მოქმედებებზე" საზოგადოების პასუხიც შესაბამისი იქნება.

"რაც უფრო მეტი იქნება ასეთი ბრუტალური მოქმედებები, საზოგადოებისგან პასუხი იქნება შესაბამისი. რაც უფრო გაწელავს ხელისუფლება ზამბარას, მით უფრო მტკივნეულად მოხვდებათ მათ ცხვირში.

3 000 ლარით დამაჯარიმეს. რომ იცოდეთ, მარნეულის "კაპეზე" 24 საათში, ანუ ერთ დღეში ღირს 500 დოლარი. დაახლოებით, ეგრე გამოდის, ივანიშვილის "სტავკაა" ეგ, პარაგრაფის ფასი, თავისი სასტუმროს ფასი დაადო მარნეულის "კაპეზეს", — თქვა მან.

უგულავა საქალაქო სასამართლოსთან ექსპრეზიდენტ მიხეილ სააკაშვილის მხარდამჭერ აქციაზე 29 ნოემბერს დააკავეს. მთაწმინდის რაიონის პოლიციის ხელმძღვანელმა, გოგა მემანიშვილმა თქვა, რომ ის ადმინისტრაციული, კერძოდ, 173-ე მუხლით იყო დაკავებული, რაც პოლიციელის კანონიერი მოთხოვნისადმი დაუმორჩილებლობას გულისხმობს.

უგულავას გარდა, სასამართლოსთან აქციის სხვა მონაწილეებიც დააკავეს. შეკრებილებსა და სამართალდამცავებს შორის იყო დაპირისპირებასაც, რა დროსაც რამდენიმე პირი, მათ შორის, ოპერატორები შეუძლოდ გახდნენ. აქციაზე შსს-მ სავარაუდოდ, წიწაკის სპრეიც გამოიყენა.