ჯილ ბაიდენმა თეთრი სახლი საშობაოდ პირველად მორთო (ფოტოები)

საშობაოდ თეთრი სახლის განსაკუთრებული დეკორაციებით მორთვა ათწლეულოვანი ტრადიციაა, რომელსაც ძირითადად, როგორც წესი, პირველი ლედი უდგას ხოლმე სათავეში. წელს ეს პატივი მელანია ტრამპის შემდეგ ჯილ ბაიდენს ერგო. ბაიდენებმა წლევანდელი მორთულობის თემატიკად "საჩუქრები გულიდან" დაასახელეს.

ფოტო: ANDREW CABALLERO-REYNOLDS / AFP / GETTY IMAGES

"ის, რაც ჩვენთვის წმინდაა, გვაერთიანებს და მანძილს, დროსა და პანდემიის შეზღუდვებსაც კი აღემატება: რწმენა, ოჯახი და მეგობრობა, ხელოვნების სიყვარული, სწავლა და ბუნება, მადლიერება, დახმარება და საზოგადოება, ერთიანობა და მშვიდობა. ეს ის საჩუქრებია, რომლებიც ჩვენი ცხოვრების მთავარ ძაფებს ერთმანეთთან აკავშირებს", — ასე განმარტეს ბაიდენებმა პირველი შობის მთავარი თემატიკა.

თეთრი სახლის მორთვას 1 კვირა, 41 ნაძვის ხე, 78 ათასზე მეტი განათება და უამრავი ბაფთა დასჭირდა. თითოეული ოთახის მორთულობა ერთმანეთისგან განსხვავებულია და სიმბოლური დატვირთვაც აქვს. მაგალითად, ლურჯი ოთახი, სადაც თეთრი სახლის მთავარი ნაძვის ხე დგას, მშვიდობისა და ერთიანობის სიმბოლო გახდა. ამის აღსანიშნავად ნაძვის ხე მტრედებითაა მორთული.

სასადილო დარბაზში ორი ნაძვის ხე ჩარჩოში ჩასმული ფოტოებით მორთეს. ყოფილი პრეზიდენტებისა და მათი ოჯახების ფოტოების გარდა, რამდენიმე კადრი ბაიდენების პირადი არქივიდანაცაა, რომელიც აქამდე საჯაროდ ხელმისაწვდომი არ იყო.

ჯილ ბაიდენმა საბოლოო შედეგი პრეზიდენტთან ერთად კვირას, მადლიერების დღის შემდეგ დაათვალიერა. დეკორაციებსა და მორთულობის იდეებზე მუშაობა ზაფხულიდან დაიწყო. როგორც ჩანს, მის ძალისხმევას უკვალოდ არ ჩაუვლია, რადგან თეთრ სახლში ნამდვილად სადღესასწაულო განწყობა ტრიალებს.

ბოლო ამბები:

გირჩევთ

ჯილ ბაიდენმა თეთრი სახლი საშობაოდ პირველად მორთო (ფოტოები)

კომენტარები

კვირის ტოპ-5

გირჩევთ

ახლა კითხულობენ

8 ქალმა ევროსაბჭოს ადამიანის უფლებათა კომისარს იზოლატორებში გაშიშვლების პრაქტიკის შესახებ წერილით მიმართა